Lagarde harðorð í garð Grikkja, þeir fá 10 daga frest

Christine Lagarde forstjóri Alþjóðagjaldeyrissjóðsins (AGS) var harðorð í garð Grikkja í gærkvöldi að loknum fundi hennar með fjármálaráðherrum evrusvæðisins í Lúxemborg.

Lagarde sagði að það væri kominn tími til þess að Grikkir gerðu eitthvað í sínum málum í stað þess að ræða bara endalaust um vandamálin.

Á fundinum var ákveðið að Grikkir fengju tíu daga frest eða fram til 18. október til að þess að koma á fót nauðsynlegum hagræðingar og sparnaðaraðgerðum sínum. Þessar aðgerðir eru forsenda þess að Grikkir fái næstu útborgun frá Alþjóðagjaldeyrissjóðnum og Evrópisambandinu.

Yfirvöld í Grikklandi hafa sagt að ef þeir fá ekki næstu útborgun úr neyðaraðstoð AGS og ESB muni ríkiskassi þeirra tæmast í næsta mánuði. Útborgunin nemur 31,5 milljörðum evra.