Gunnar Heiðar meðal tíu bestu í Svíþjóð

Gunnar Heiðar Þorvaldsson, Alfreð Finnbogason og Ari Freyr Skúlason komust allir í hóp 50 bestu leikmanna sænsku úrvalsdeildarinnar að mati sænska dagblaðsins Expressen.

Blaðið birtir úttektina á heimasíðu sinni í dag. Gunnar Heiðar er í níunda sæti en hann er meðal markahæstu leikmanna deildarinnar með sín sextán mörk fyrir Norrköping.

„Var markakóngur með Halmstad en hefur fundið taktinn á ný og er beinskeyttur í teignum. Hann hefur skorað sextán mörk og er næstmarkahæstur í deildinni eftir að hafa til að mynda skorað þrennu gegn Sundsvall," segir í umfjöllun Expressen.

Alfreð Finnbogason var í láni hjá Helsingborg í sumar en félagið keypti hann ekki þegar það stóð til boða. Í dag leikur hann með Heerenveen í Hollandi þar sem hann hefur skorað grimmt. Hann er í sautjánda sæti á lista Expressen.

„Var markamaskína áður en hann fór til Heerenveen í Hollandi. Tólf mörk í sautján leikjum."

Ari Freyr Skúlason, leikmaður Sundsvall, er í 47. sæti eins og fjallað er um hér fyrir neðan.

Waris Majeed, leikmaður Häcken, er besti leikmaður deildarinnar að mati Expressen en hann er einnig markahæstur með 22 mörk til þessa.