Vogunarsjóðirnir höfðu sigur í Grikklandi

Gríska ríkið vildi kaupa skuldir landsins á markaði með miklum afslætti, eða um 28 til 30 sent fyrir hverja evru, og leysa þar með mikinn vanda sem ríkissjóður glímdi við. Vogunarsjóðir, sem voru eigendur ríkisskuldanna, höfðu sett sér það markmið að fá 34 til 35 sent fyrir hverja evru, en þeir keyptu skuldirnar á slikk, með það að markmiði að endurheimta meira en ráð var fyrir gert þegar þeir eignuðust skuldir.

Framkvæmdastjóri hjá Deutsche Bank, Hakan Wohlin, lagði til við embættismenn hjá Evrópusambandinu að gríska ríkið fengi að kaupa skuldirnar á fyrrnefndu verði, 28 til 30 sent á hverja evru, og leysa þannig mikinn vanda. Hann rökstuddi í minnisblaði að þetta væri í samræmi við lög og reglur, og myndi ekki valda umróti á markaði. Þá sagði hann að vel væri hægt að koma þessu í kring með því að þvinga sjóðina sem áttu skuldir Grikklands til sölu á þessu verði.

Eftir mikil átök bak við tjöldin varð úr að vogunarsjóðirnir náðu sínu fram, 12. desember sl., það er fengu þær endurheimtur á skuldunum sem að var stefnt.

Greint er frá þessari atburðarás í ítarlegri grein sem birtist í New York Times í gær. Hana má lesa hér.