Hannes í sænsku úrvalsdeildina

Sænskir fjölmiðlar fullyrða að Hannes Þ. Sigurðsson sé genginn til liðs við sænska úrvalsdeildarfélagið Mjällby.

Félagaskiptaglugginn lokaði í nótt og er fullyrt að forráðamenn Mjällby hefðu gengið frá pappírsvinnunni aðeins nokkrum mínútum fyrir miðnætti. Þeir vildu þó ekkert staðfesta í samtali við sænska miðla.

Hannes lék síðast með Atyrau í Kasakstan en fyrr í vetur var hann hársbreidd frá því að fara til Inverness í Skotlandi en féll svo á læknisskoðun.

Hann lék áður með Sundsvall í Svíþjóð og þekkir því vel til í sænska boltanum, auk þess að hafa spilað bæði í Noregi og Danmörku.

Mjällby tapaði fyrir Norrköping, 2-1, í fyrstu umferð tímabilsins í Svíþjóð á dögunum.