Margrét Lára skoraði tvö mörk í kvöld

Margrét Lára Viðarsdóttir skoraði tvö mörk fyrir Kristianstad þegar stelpurnar hennar Elísabetar Gunnarsdóttur unnu 4-1 útisigur á botnliði Sunnanå í sænsku kvennadeildinni í kvöld. Kristianstad komst upp í sjöunda sætið með þessum sigri.

Fyrra mark Margrétar Láru kom strax á fyrstu mínútu leiksins en Susanne Moberg bætti við öðru marki á 32. mínútu. Sunnanå minnkaði muninn á 58. mínútu.

Danska landsliðskonan Johanna Rasmussen skoraði þriðja markið á 77. mínútu og aðeins tveimur mínútum síðar bætti Margrét Lára við sínu öðru marki í leiknum.

Sif Atladóttir var í byrjunarliði Kristianstad en þurfti að fara af velli á 53. mínútu. Margrét Lára spilað hinsvegar allar 90 mínúturnar.

Margrét Lára hefur nú skorað 13 mörk í 20 leikjum í sænsku deildinni á þessu tímabili og það hafa bara tveir leikmenn í deildinni skorað fleiri mörk en íslenska landsliðskonan.