Ragnar Sig: Ég hef aldrei séð þennan mann

Landsliðsmaðurinn Ragnar Sigurðsson hefur ekki miklar áhyggjur af framherja Króata, Mario Mandzukic.

Ragnar ræddi málin við Arnar Björnsson fyrir æfingu íslenska liðsins á Kópavogsvelli í dag. Hann var spurður út í tröllið í sókninni hjá Króötum en Mandzukic spilar frammi hjá Evrópumeisturum Bayern München.

„Ég er ekki að grínast en ég hef aldrei séð þennan mann. Er hann ekki í Bayern? Ég horfi ekki mikið á þýska boltann. Ég veit ekkert um hann. Ég hef heyrt að hann sé mjög góður,“ segir Ragnar.

Miðvörðurinn segist vonast til þess að halda sæti sínu í liðinu og fá að taka á Króötum. Ísland geti vel unnið Króata.

„Maður er aldrei hræddur. Maður verður eflaust pínkulítið stressaður rétt fyrir leik. Þegar leikurinn byrjar gleymir maður því öllu og gerir alltaf sitt besta,“ segir Ragnar. Planið sé að vinna leikinn og halda hreinu. Það yrðu frábær úrslit.