Fjórir stungnir eftir leik Broncos og Chargers

Það gekk mikið á eftir leik Denver Broncos og San Diego Chargers í NFL-deildinni í nótt og voru að minnsta kosti þrír stungnir í miklum slagsmálum á bílastæðinu fyrir utan völlinn.

Lögreglan í Denver segist hafa heimildir fyrir því að fjórði maðurinn hafi verið stunginn en sá lét sig hverfa af vettvangi og er ekki vitað um líðan hans.

Einn maður er hætt haldinn á gjörgæsludeild en aðrir munu jafna sig.

Þetta er því miður ekki fyrsta leiðinlega uppákoman utan vallar á völlum í Bandaríkjunum í vetur. Fyrr í mánuðinum lést maður á bílastæði Kansas City Chiefs eftir átök.

Einnig var slegist á vellinum í San Francisco. Svo má ekki gleyma alvarlegum slysum er fólk hefur fallið úr stúku og svo er í það minnsta eitt atvik í vetur er áhorfandi reyndi að taka eigið líf á vellinum.