Ekkert gefins á Korpunni

Á morgun hefst keppni á Eimskipsmótaröðinni í golfi og þar með verður íslensku golfvertíðinni formlega ýtt úr vör. Fyrsta mótið fer fram á Akranesi en mótin verða alls sex í sumar. „Það er mikil spenna í mönnum eftir langar æfingar í vetur. Nú vilja menn spreyta sig á völlunum,“ sagði landsliðsþjálfarinn Úlfar Jónsson við Fréttablaðið í gær.

„Mér líst mjög vel á þann hóp afrekskylfinga sem við eigum í dag. Breiddin er alltaf að aukast og sífellt fleiri kylfingar að fara í háskóla erlendis, þar sem þeir æfa við bestu aðstæður og keppa allan ársins hring. Það er nauðsynlegt til að komast á næsta stig.“ Evrópumeistari í liðinu Meðal þeirra kylfinga sem eru nú nýkomnir aftur heim eftir háskóladvöl ytra er Guðmundur Ágúst Kristjánsson, sem hefur sett markið hátt þetta sumarið. „Það er alltaf gaman að koma heim og spila,“ sagði Guðmundur, sem hefur verið í námi í Bandaríkjunum síðan í haust.

Hann segist hafa farið vel af stað í haust en gefið síðan eftir á seinni hluta tímabilsins.

„En þetta var dýrmæt reynsla og auðvitað ótrúlega gaman að geta spilað við frábærar aðstæður allan veturinn. Við erum með fámennt en góðmennt lið í háskólanum en Evrópumeistari einstaklinga er í liðinu. Þá gæti æfingaaðstaðan ekki getað verið betri,“ segir hann. Hann segir að dvölin ytra hafi nú þegar komið sér að góðum notum.

„Það er í raun ekki hægt að gera mikið yfir vetrartímann hér á Íslandi og því var alltaf planið hjá mér að komast út strax eftir menntaskóla. Ég hef náð að bæta stutta spilið sérstaklega enda þarf maður allt öðruvísi og hærri högg þarna úti en hér heima, þar sem maður kemst yfirleitt upp með að halda höggunum lágum.“ Hann segir að markmiðið fyrir golfsumarið hér heima sé einfalt.

„Ég ætla að vinna Íslandsmótið. Það er kannski erfitt að vera með markmið fyrir stigalistann þar sem ég næ ekki að keppa nema á þremur til fjórum mótum en langstærsta staka mótið í sumar er Íslandsmótið en þar verða allir þeir sterkustu saman komnir,“ segir Guðmundur en mótið í ár fer fram á Korpúlfsstaðavelli, sem hann telur sem sinn heimavöll. Íslandsmótið á mínum heimavelli

„Hérna hef ég alist upp,“ segir hann en í næsta mánuði verða níu nýjar holur teknar í notkun á vellinum. Það verður spilað á þeim á Íslandsmótinu í sumar.„Þær líta mjög vel út. Það er ekki spurning um að þetta er alvöru golfvöllur þar sem maður fær ekkert gefins.“

Annar GR-ingur, Haraldur Franklín Magnús, er núverandi Íslandsmeistari en hann og Guðmundur eru góðir félagar. Haraldur vann einnig Íslandsmótið í holukeppni og tók því tvo stærstu titlana síðasta sumar.

„Við erum báðir búnir að vera úti í vetur og hann var mjög góður í fyrra. Það er samt ætlunin að velta honum úr sessi,“ segir Guðmundur Ágúst sposkur á svip.

Úlfar Jónsson, landsliðsþjálfari í golfi, segir að það verði hörð samkeppni um sæti í landsliðum karla og kvenna fyrir verkefni sumarsins.

Stærsta verkefni sumarsins verður Evrópumót kvenna í Englandi og undankeppni fyrir Evrópumót karla í Tékklandi.

„Það verður hörð samkeppni um landsliðssæti,“ segir Úlfar en tveir efstu íslensku kylfingarnir á heimslista áhugamanna eiga öruggt sæti í landsliðinu, sem og tveir stigahæstu á mótaröðinni. Þjálfarinn velur svo síðustu tvo kylfingana í hvorum flokki.

 

„Það sem gildir fyrir kylfingana er að standa sig vel í sínum verkefnum og því meiri samkeppni sem ríkir um sætin, því betra. Auðvitað er ákvörðun þjálfarans svo umdeild en þannig á það að vera,“ segir Úlfar.