Spurt er „störfin eða deiliskipulagið – hvort er mikil­vægara“?

Stefán Guðmundsson, framkvæmdastjóri Gentle Giants (GG) ritaði grein í síðasta tölublað Skarps. Ég tel ástæðu til að svara henni að nokkru og hefst nú svarið. Nokkur atriði sem við erum sammála um. Deiliskipulag er mannanna verk sem ekki er meitlað í stein, sumarveitingastaðurinn Pallurinn bauð upp á frábæran mat, góða þjónustu og skemmtilega upplifun, það leyfi sem staðurinn hafði rann út 1. okt. 2013 og staðurinn hefur ekki verið starfsræktur síðan í september árið 2013.

Hvert starf skiptir samfélagið máli, um það eru allir sammála. Ef störfum fækkar töpum við, ef þeim fjölgar högnumst við. Þess vegna væntir maður þess að ríki, sveitarfélög og fyrirtæki kappkosti við að fjölga störfum. Sveitarfélög nýta opinbert fé til að skapa góð skilyrði fyrir fyrirtæki í rekstri, hvort heldur sem er að fjölga flotbryggjum og bæta aðstæður fyrir hvalaskoðunarfyrirtæki eða breyta deiliskipulagi svo hægt sé að byggja veitingahús á Hafnarstéttinni.

Það er hinsvegar mikilvægt að halda staðreyndum til haga.

Fyrst um skúralóðina, Hafnarstétt 5.

-         Fyrri hluta árs 2010 kaupir sveitarfélagið lóðina að Hafnarstétt 5 og selur GG lóðina á 6 milljónir. Um það er gerður kaupsamningur.

-         Í kaupsamningi stendur; „seljandi [Norðurþing]mun fjarlægja þau hús sem á lóðinni standa og skuldbindur kaupandi [GG]sig til að byggja nýtt hús og er við það miðað að þeirri byggingu verði lokið 31. maí 2011“. Því er ljóst að GG á skúrana þrjá og Norðurþing mun fjarlægja þá þegar GG hefur framkvæmdir.

-         Vinna við nýtt deiliskipulag miðhafnarsvæðisins á Húsavík hófst í maí 2011 og lauk með samþykki bæjarstjórnar í sept. 2012.

-         Á fundi skipulags- og bygginganefndar segir; „Engin athugasemd barst við skipulagstillöguna á kynningartíma.  Þó liggur fyrir ósk Stefáns Guðmundssonar f.h. Hvalaferða ehf. um rýmri nýtingarrétt á lóðinni að Hafnarstétt 5 en fyrir liggur í kynntri tillögu.

Skipulags- og byggingarnefnd leggur til að nýtingarhlutfall lóðarinnar að Hafnarstétt 5 verði 0,63 til samræmis við óskir lóðarhafa og er skipulagsráðgjafa falið að færa þá breytingu inn á skipulagsuppdrátt.“

-         Stefán Guðmundsson hafði opnað á þá hugmynd setja skúrana þrjá niður við smábátabryggjuna. Sú hugmynd hlaut ekki brautargengi í skipulagsferlinu.

-         Forstöðumaður Menningarmiðstöðvar Þingeyinga tók skúrana út og hafði samráð við Minjastofnun um það á sínum tíma um hvort skúrarnir hefðu eitthvert varðveislugildi. Ekki var talið að þeir hefðu sérstakt varðveislugildi. En einn slíkur stendur til varðveislu á Sjóminjasafninu.

-         Vilji GG gera skúrana upp verður fyrirtækið að afla sér lóðarréttinda og koma húsunum þar fyrir. Það hefur legið fyrir í fimm ár.

-         Það er augljós fyrirsláttur hjá Stefáni að halda því fram að ákvarðanir sveitarfélagsins um skúrana hafi valdið vandræðum og töfum í ferlinu.

Þegar þetta er skrifað hefur GG ekki skilað inn til bæjarins fullnægjandi teikningum af því húsi sem fyrirtækið hyggst byggja og því enn ekki aflað sér byggingarleyfis á Hafnarstétt 5 þrátt fyrir kvaðir þar um í kaupsamningi.

Í öðru lagi um skúrana á þaki Nausts

-         Tveir skúrar hafa staðið um nokkurra ára skeið á þakinu og hýst veitingastarfsemi.

-         Í júní árið 2012 var samþykkt í skipulags- og bygginganefnd að veita stöðuleyfi fyrir skúrana til loka október 2012.

-         Í júní árið 2013 var enn samþykkt í skipulags- og bygginganefnd að veita stöðuleyfi fyrir skúrana til loka október 2013.

-         Þann 12. júní árið 2013 barst Gentle Giants bréf þess efnis að Pallurinn væri starfsræktur á stöðuleyfi og þyrfti að víkja fyrir 1. október 2013.

-         Umsókn um nýtt stöðuleyfi barst í marsmánuði árið 2014.

-         Á bæjarstjórnarfundi í ferbúar lagði Friðrik Sigurðsson, bæjarfulltrúi Þinglistans, fram tillögu um að skúrar sem standa á þaki Nausts, fái að standa til 1. október 2014. Þá lá ekki fyrir umsókn Gentle Giants um stöðuleyfi fyrir umrædda skúra og því ekki hægt að samþykkja stöðuleyfi fyrir hlut sem ekki hefur verið óskað eftir að fái stöðuleyfi. Tillagan var því felld.

-         Á síðasta fundi bæjarstjórnar lá fyrir tillaga um stöðuleyfi fyrir miðasöluhús GG og umrædda skúra. Bæjarstjórn samþykkti stöðuleyfi fyrir miðasöluhús enda samkvæmt skipulagi en hafnaði umræddum skúrum. Tekið skal fram að Friðrik Sigurðsson, frambjóðandi Sjálfstæðisflokksins samþykkti að skúrarnir skyldu víkja. Tillaga um  stöðuleyfi fyrir miðasöluhús og að skúranir skyldu víkja því samþykkt.

Deiliskipulag miðhafnarsvæðisins

Skipulagið var staðfest í bæjarstjórn 18. september 2012. Hvorki GG, Stefán Guðmundsson né Friðrik Sigurðsson gerðu athugasemdir við skipulagið sem nú er í gildi og unnið er eftir. Ég vil hvetja eigendur Gentle Giants til að nýta lóðina sem fyrirtækið eignaðist að tilstuðlan bæjaryfirvalda á sínum tíma á Hafnarstéttinni og halda áfram að byggja upp sitt fyrirtæki. Maturinn á Pallinum var dásamlegur og skemmtileg upplifun að borða þar. Því er ég sammála. Hvers eiga þeir aðilar að gjalda sem kosta því til að byggja upp mannvirki sem fullnægja ákvæðum skipulags og reglugerða til reksturs og borga af þeim gjöld til samfélagsins meðan aðilinn við hliðina rekur sín viðskipti úr óskráðum skúrum? Er hægt að tryggja öryggi viðskiptavina úr vanbúnum eldhúsum? Umsækjandi að stöðuleyfinu (GG) á húseign upp á 47m2 á þakinu og getur hæglega breytt þeirri aðstöðu til veitingasölu.

Ákvarðanir bæjarfulltrúa byggjast ekki á því hvort matur og þjónusta á Pallinum hafi verið til mikillar fyrirmyndar né hvort verð hafi verið lægra en á öðrum veitingastöðum.

Að lokum

Framundan eru sveitarstjórnarkosningar. Eflaust hyggst einhver nýta sér þetta mál í þeirri skemmtilegu vinnu sem framundan er. Svari nú hver fyrir sig.