Dreifði 100 dollara seðlum uppdópaður

Stjörnuútherji Denver Broncos, Wes Welker, hefur verið dæmdur í fjögurra leikja bann vegna lyfjanotkunar. Amfetamín fannst í leikmanninum.

Hann er sagður hafa tekið tískudópið Molly á Kentucky Derby-veðreiðunum á dögunum. Þar fór leikmaðurinn mikinn en hann dreifði 100 dollara seðlum til viðstaddra líkt og hann væri að gefa krökkum nammi.

"Hann sagðist hafa unnið á veðreiðunum og gaf peninga þar til lögreglan stöðvaði hann. Það var allt að verða vitlaust," sagði einn af þeim sem fékk pening hjá Welker en búntið sem hann hélt á var eitt það rosalegasta sem menn hafa séð.

Þessi hegðun er mikið áfall fyrir Broncos sem á erfiða leiki í upphafi tímabilsins og má illa við því að missa lykilmenn úr liðinu.

Fyrir nokkrum dögum síðan var sparkari liðsins, Matt Prater, dæmdur í fjögurra leikja bann fyrir lyfjanotkun þannig að eitthvað agaleysi virðist vera á liðinu.