Margir yrðu hissa ef Ísland kæmist á EM

Enginn Jón Arnór Stefánsson – ekkert mál fyrir íslenska körfuboltalandsliðið. Íslenska karlalandsliðið vann í fyrrakvöld einn sinn stærsta sigur frá upphafi þegar liðið mætti Bretlandi og kom sér í fín mál í baráttunni um laust sæti á Evrópumótinu á næsta ári. Tveir ungir leikmenn stigu fram á stóra sviðið í fjarveru besta leikmanns liðsins og sýndu mögnuð tilþrif.

Í stöðunni 36-43 fyrir Breta var útlitið ekki bjart og morgunljóst að eitthvað varð að gerast hjá íslenska liðinu. Bretar voru búnir að skora 9 af fyrstu 11 stigum seinni hálfleiksins og komnir með sjö stiga forystu.

Þetta var tímapunktur í mikilvægum leik þar sem ungir drengir gátu orðið að mönnum og Ísland átti tvo slíka.

Kom óttalaus inn í leikinn

Íslenska liðið vann síðustu sextán og hálfa mínútu leiksins með 20 stiga mun og hinn 22 ára gamli Haukur Helgi Pálsson og hinn 19 ára gamli Martin Hermannsson fóru fyrir frábærum lokaspretti.

„Við fengum „auka-búst“ frá Martin því hann kom svo óttalaust inn í leikinn í seinni hálfleiknum,“ sagði Hlynur Bæringsson, fyrirliði íslenska liðsins.

Saman voru þeir Martin og Haukur Helgi með 32 stig á þessum kafla eða fimm fleiri stig en allt breska liðið til samans. Þeir hittu úr 13 af 15 skotum sínum og töpuðu ekki bolta.

„Eigum við ekki að segja að það hafi verið tveir fyrir einn tilboð,“ sagði Martin Hermannsson kíminn eftir leik. „Martin stóð sig mjög vel í kvöld og ég er bara enn að átta mig á því hversu góður hann er,“ sagði Haukur.

Hann var með hæsta framlag allra í Evrópukeppninni þennan dag og Ísland vann þær mínútur sem hann spilaði með 23 stigum. Það var vitað að það myndi enginn einn feta í fótspor Jóns en með svona tvíeyki í svona ham eru liðinu margir vegir færir.

Lítill Jón Arnór númer níu

Haukur Helgi hefur verið í stóru hlutverki með íslenska landsliðinu síðustu tvö ár en Martin kiknaði við að klæðast treyju Jóns Arnórs.

„Þjálfarnir sögðu að ég þyrfti að stíga upp fyrst Jón var ekki með. Mér fannst við gera það ágætlega við báðir tveir,“ sagði Haukur, sem byrjaði leikinn rosalega vel. Martin byrjaði á bekknum og var rólegur framan af en sýndi svo mögnuð tilþrif á lokakaflanum. „Það var smá fiðringur til að byrja með en þegar leið á leikinn komst ég betur inn í þetta, leið betur og lét leikinn koma til mín,“ sagði Martin.

Íslenska liðið er einu stóru skrefi nær úrslitakeppni EM eftir sigurinn en fram undan eru erfiðir útileikir við Bosníu og Bretland.

Margir yrðu hissa

„Það er gaman að eiga möguleika á því að komast á Eurobasket. Það verður saga til næsta bæjar og margir yrðu örugglega hissa á að sjá okkur þar,“ sagði Hlynur Bæringsson en bætti svo við: „Það er samt langt í frá að við séum komnir þangað.“