Ekki Þrándarson heldur bara Aron

Norska úrvalsdeildarliðið Álasund kynnti fjóra nýja leikmenn formlega til sögunnar hjá félaginu í dag, en þar á meðal eru tveir Íslendingar.

Aron Elís Þrándarson, sem Álasundi keypti frá Víkingi, og Grindvíkingurinn Daníel Leó Grétarsson eru gengnir í raðir liðsins, en einnig voru kynntir til leiks Svíinn Calle Björk og Finninn Tero Mäntylä.

Calle Björk kemur til Álasunds frá Brattvåg IL en Finninn Mäntylä var síðast á mála hjá búlgarska liðinu Ludogorets Razgrad sem var með Liverpool í riðli í Evrópudeildinni.

Aron Elís verður númer ellefu hjá Álasundi og verður ekki með Þrándarson, eða Thrandarson, aftan á treyjunni heldur bara fornafnið Aron. Daníel Leó verður númer þrjú og notast við eftirnafnið.

Álasund var í fallbaráttu lengi vel í norsku úrvalsdeildinni á síðsutu leiktíð, en liðið ætlar sér stærri hluti í sumar og stefnir á efstu fjögur sætin, en það náði fjórða sæti árið 2013.

Velkommen til AaFK, Ålesund, Sunnmøre og Norge! @MantylaTero @callebjork @aronthrandar og Daniel Gretarsson #aafk pic.twitter.com/viZhiV3Cn2

— AaFK - Aalesunds FK (@AalesundsFK) January 6, 2015