Jón Arnór Stefánsson er Íþróttamaður ársins 2014

Körfuboltamaðurinn Jón Arnór Stefánsson var í kvöld kosinn Íþróttamaður ársins 2014 en fékk flest atvæði í árlegu í kjöri Samtaka íþróttafréttamanna.

Þetta er í fyrsta sinn sem Jón Arnór Stefánsson fær þessi verðlaun en hann var nú í níunda sinn meðal tíu efstu í kjörinu.

Knattspyrnumaðurinn Gylfi Þór Sigurðsson, Íþróttamaður ársins 2013, varð í öðru sæti í kjörinu að þessu sinni en þriðji varð síðan handboltamaðurinn Guðjón Valur Sigurðsson.

Jón Arnór fór á árinu fyrir íslenska körfuboltalandsliðinu þegar það tryggði sér sæti á stórmóti í fyrsta sinn í sögunni. Íslenska landsliðið verður með á Evrópumótinu á næsta ári og þar munaði mikið um frábæra frammistöðu Jóns Arnórs í síðustu tveimur leikjum liðsins.

Jón Arnór skoraði 22,0 stig að meðaltali í riðlakeppninni þar af 23 stig á 29 mínútum í 71-69 sigri á Bretland í Koparkassanum í Ólympíuþorpinu í London.  

Jón Arnór skoraði meðal annars stærstu körfu leiksins í London þegar hann skoraði úr þriggja stiga skoti 44 sekúndum fyrir leikslok og kom íslenska landsliðinu fjórum stigum yfir, 71-67. Jón Arnór skoraði fimm síðustu stig Íslands í leiknum.

Jón Arnór spilaði á árinu með tveimur liðum í spænsku úrvalsdeildinni, næststerkustu deild heims á eftir NBA-deildinni í Bandaríkjunum.

Jón Arnór hóf árið með CAI Zaragoza sem endaði í 8. sæti á Spáni og komst í undanúrslit spænska bikarsins en Jón Arnór var fyrirliði liðsins.

Jón Arnór samdi síðan við stórliðið Unicaja Malaga en lið hans endaði árið í efsta sæti spænsku deildarinnar og komið í sextán liða úrslit Euroleague, sem er Meistaradeild körfuboltans í Evrópu.



Íþróttamaður ársins 2014 - þau fengu stig:

1. Jón Arnór Stefánsson (körfubolti) 435 stig

2. Gylfi Þór Sigurðsson (knattspyrna) 327

3. Guðjón Valur Sigurðsson (handbolti) 303

4. Sara Björk Gunnarsdóttir (knattspyrna) 147

5. Aron Pálmarsson (handbolti) 100

6. Eygló Ósk Gústafsdóttir (sund) 65

7. Sif Pálsdóttir (fimleikar) 56

8. Hrafnhildur Lúthersdóttir (sund) 46

9. Hafdís Sigurðardóttir (frjálsar) 44

10. Jón Margeir Sverrisson (íþr. fatlaðra) 36

11. Alfreð Finnbogason (knattspyrna) 26

12. Karen Knútsdóttir (handbolti) 25

13. Helgi Sveinsson (íþr. fatlaðra) 24

14. Aníta Hinriksdóttir (frjálsar) 21

15. Ásgeir Sigurgeirsson (skotfimi) 19

16. Hlynur Bæringsson (körfubolti) 15

17. Birgir Leifur Hafþórsson (golf) 11

18. Dagný Brynjarsdóttir (knattspyrna) 10

19. Gísli Sveinbergsson (golf) 9

20. Aron Einar Gunnarsson (knattspyrna) 8

21. Thelma Björg Björnsdóttir (íþr. fatlaðra) 7

22. Helena Sverrisdóttir (körfubolti) 4

23. Helga María Vilhjálmsdóttir (skíði) 3

24. Ásdís Hjálmsdóttir (frjálsar) 2

– Viðar Örn Kjartansson (knattspyrna) 2

– Lilja Lind Helgadóttir (lyftingar) 2

– Hörður Axel Vilhjálmsson (körfubolti) 2

28. Fanney Hauksdóttir (kraftlyftingar) 1

– Jón Daði Böðvarsson (knattspyrna) 1

– Þormóður Árni Jónsson (júdó) 1