Arnór þakkaði traustið og skoraði

Skagamaðurinn Arnór Smárason var á skotskónum fyrir Helsinborg í sænsku úrvalsdeildinni í dag þegar liðið tapaði á útivelli gegn Gefle, 2-1.

Líberíumaðurinn Dioh Williams skoraði bæði mörk Gefle; það fyrra á 23. mínútu og það síðara á 37. mínútu, en staðan var 2-0 fyrir heimamenn í hálfleik.

Arnór, sem var í byrjunarliðinu þriðja leikinn í röð, þakkaði traustið sem Henrik Larsson hefur sýnt honum að undanförnu og skoraði þriðja mark sitt í deildinni í níunda leiknum sem hann spilar.

Það gengur ekkert hjá Helsingborg þessa dagana, en liðið var í dag að tapa fjórða leiknum í röð og er fallið niður í áttunda sæti sænsku úrvalsdeildarinnar.

Helsingborg er með 30 stig eftir 24 leiki og siglir lygnan sjó um miðja deild.