Tvöföld íslensk kveðjustund í Stafangri í dag

Tveir íslenskir knattspyrnumenn spila kveðjuleik sinn með norska félaginu Viking í kvöld þegar lokaumferð norsku úrvalsdeildarinnar fer fram.

Þetta eru þeir Indriði Sigurðsson og Jón Daði Böðvarsson, sem hafa reyndar spilað mislengi með félaginu, en hafa báðir unnið hug og hjörtu stuðningsmanna Viking með góðri frammistöðu.

Það verður því tvöföld íslensk kveðjustund á Viking Stadion á eftir en leikur Viking og Mjöndalen hefst klukkan 17.00 að íslenskum tíma.

Indriði, sem er nýorðinn 34 ára gamall, hefur verið fyrirliði Viking undanfarin ár og er búinn að spila með liðinu frá árinu 2009. Hann hefur spilað 170 leiki með liðinu í norsku úrvalsdeildinni.

Indriði var búinn að tilkynna það í vor að hann væri á heimleið enda er fjölskyldan hans flutt til Íslands. Það kom síðan í ljós á dögunum að Indriði er búinn að skrifa undir samning við KR og er því á leiðinni aftur til síns uppeldisfélags.

Jón Daði Böðvarsson er 23 ára gamall og er að klára sitt þriðja tímabil með liðinu. Jón Daði er að renna út á samning og hefur ákveð að fara til þýska liðsins  Kaiserslautern um áramótin.

Jón Daði hefur átt mjög gott lokatímabil með Viking en hann hefur skorað níu mörk og lagt upp önnur sjö. Jón Daði hefur aldrei skorað eða lagt upp fleiri mörk á einu tímabili í Noregi en hann hefur bætt sinn besta árangur á hverju tímabili síðan að hann kom til Viking.

Indriði og Jón Daði geta hjálpað öðru Íslendingaliði í þessum leik því mótherjarnir í Mjöndalen eru í harðri baráttu við Guðmund Kristjánsson og félagar í Start um að komast í umspilið um sæti í deildinni.

Mjöndalen er eins og er í næstneðsta sæti sem þýðir fall í b-deild. Þriðja neðsta sætið, sætið sem Start í fyrir lokaumferðina, gefur aftur á móti sæti í umspili við lið í b-deildinni um laust sæti í deildinni á næsta ári.

Það munar bara einu stigi á liðunum en á sama tíma og Mjöndalen heimsækir lið Viking þá tekur Start á móti sterku liði Molde sem tryggði sér sæti í 32 liða úrslitum Evrópudeildarinnar í vikunni.