Klopp fer aðrar leiðir en Rodgers í Evrópudeildinni

Það verður ekkert varalið hjá Jürgen Klopp, knattspyrnustjóra Liverpool, þegar lið hans heimsækir Rubin Kazan í Evrópudeildinni á fimmtudaginn.

Forveri hans í starfi, Brendan Rodgers, stundaði það ítrekað að hvíla sína bestu menn í Evrópudeildarleikjum en Klopp freistast ekki til þess í þessum leik að minnsta kosti.

Liverpool gerði jafntefli í fyrstu þremur leikjum sínum undir stjórn Jürgen Klopp en hefur nú unnið tvo síðustu leiki sína, 1-0 sigur á Bournemouth í deildabikarleik og svo 3-1 sigur á Chelsea á Stamford Bridge á laugardaginn var.

Flestir leikmenn sem tóku þátt í sigrinum á Chelsea í ensku úrvalsdeildinni um síðustu helgi fljúga til Rússlands.

Það er því strax ljóst að Klopp mun tefla fram sterku liði á Kazan Arena á fimmtudaginn en næsti leikur á eftir er síðan á móti Crystal Palace á sunnudaginn.

Kazan Arena er nýbyggður leikvangur (fyrir HM 2018) en þarna fór fram HM í sundi í sumar. Til að koma sundlauginni fyrir var grasið tekið í burtu en nú hafa menn lokið því að koma grasvellinum aftur á sinn stað og því getur leikurinn við Liverpool orðið fyrsti Evrópuleikurinn á leikvanginum.

Liverpool er í öðru sæti riðilsins en liðið hefur hvorki unnið né tapað í Evrópudeildinni til þessa því allir þrír leikir liðsins hafa endað með jafntefli.

Liverpool er eins og er með eins stigs forskot á Rubin Kazan en svissneska liðið Sion er með fjögurra stiga forskot í toppsæti riðilsins.

Liverpool lenti 1-0 ndir á heimavelli á móti Rubin Kazan í fyrri leiknum á Anfield en jafnaði metin á 37. mínútu rétt eftir að liðið varð manni fleiri. Liverpool tókst ekki hinsvegar að skora sigurmark á þeim rúmu 50 mínútum sem liðið spilaði ellefu á móti tíu.