Guðjón Valur: Ég er ekki kominn á endastöð

Það er erfitt að koma orðum að því hvað varð til þess að allt fór úrskeiðis hjá íslenska landsliðinu þegar það mætti stigalausu liði Tékklands á HM í Katar í gær. Það ræddi enginn um skyldusigur fyrir þennan leik en engum duldist að Ísland þótti mun sigurstranglegri aðilinn í leiknum, ekki síst eftir góða frammistöðu gegn Frakklandi tveimur dögum áður.

Allt annað kom á daginn og niðurstaðan var ellefu marka tap. Frammistaða Íslands var fyrst og fremst algjörlega andlaus. Ísland er tilfinningaríkt lið sem reiðir sig á baráttugleði og viljastyrk. En svo virtist sem strákarnir væru fullkomlega heillum horfnir í gær.

Mikilvægi Arons Pálmarssonar

Aron Pálmarsson er á sínum besta degi einn allra besti handboltamaður heims. Ísland var án hans í umspilsleikjunum gegn Bosníu í júlí og leikjunum í undankeppni EM í haust. Og án hans var liðið ekki svipur hjá sjón.

Eftir leik í gær kom í ljós að Aron hafði verið slappur fyrir leik. Örnólfur Valdimarsson sagði eftir leik að honum fyndist Aron laslegur. Svo þegar leikmaðurinn fékk þungt höfuðhögg í fyrri hálfleik var nógu mikil ástæða til að kippa honum af velli. Hann var þá búinn skora eitt mark úr sjö skotum.

Þeir sem komu inn fyrir Aron – Arnór Atlason og Sigurbergur Sveinsson – skoruðu ekki en áttu samanlagt átta skot.

„Þessu er best lýst eins og að við værum í kviksyndi. Það er sama hvað við reyndum að berjast – þeim mun dýpra sökk maður,“ sagði Guðjón Valur Sigurðsson sem klikkaði á öllum sex skotunum sínum í leiknum.

Ekki er ég að fara að hætta

Landsliðsfyrirliðinn hefur átt magnaðan feril. Hann var frábær á EM í fyrra og spilaði vel á síðasta ári – bæði með Kiel og síðar Barcelona. En eitthvað veldur því að hann hefur ekki náð sér á strik á löngum köflum hér í Katar og það á við um svo marga fleiri í landsliðinu.

„Ég er mjög ósáttur við mína frammistöðu. En ég er ekkert öðruvísi en aðrir. Ég er aðeins valinn í landsliðið af því að ég á erindi í það – ekki af því að ég heiti Guðjón Valur Sigurðsson og er með appelsínugult band á vinstri upphandlegg,“ segir hann.

„Ég hef ekki áhyggjur af því að ég sé kominn á endastöð enda enn að gera vel með mínu félagsliði. Það er eitthvað annað sem veldur okkur vandræðum og við þurfum að finna svör við því. Það var algjört gjaldþrot í dag en eins og sönnum Íslendingum sæmir þá skiptum við bara um kennitölu og mætum í næsta leik,“ segir hann og brosir.

„Við verðum að líta upp úr skítnum og hafa húmor fyrir þessu, eins erfitt og það er. Ekki er ég að fara að hætta.“

Gúmmítékki í Doha

Eitt er ljóst. Ísland getur á sínum besta degi spilað eins og verðandi heimsmeistari. En á þeim næsta eins og lið sem á ekki einu sinni erindi í sjálft mótið. Þrátt fyrir allt geta strákarnir komist í 16-liða úrslit með sigri á sterku liði Egyptalands, sem gæti allt eins verið á heimavelli, á morgun.

„Það er allt of mikið jójó að mínu mati og þetta höfum við upplifað að allt of miklu leyti frá því í Danmörku. Þetta er ekki nógu stöðugt hjá okkur. En við verðum að trúa því að við getum eftir tvo daga spilað jafn vel og við gerðum gegn Frakklandi,“ segir Guðjón Valur.

Eftir frábæra frammistöðu gegn Frakklandi þótti ástæða til bjartsýni gegn Tékkum. Það reyndist fölsk von og innistæðulaus ávísun á árangur – sannkallaður gúmmítékki.