Barcelona komst upp fyrir Manchester United á peningalistanum

Real Madrid er áfram besta rekna knattspyrnufélag heimsins eins og undanfarin áratug en það voru breytingar í næstu sætum fyrir neðan í nýrri samantekt Deloitte á mestri veltu fótboltafélaga á síðasta tímabili.

Real Madrid velti 577 milljónum evra á síðustu leiktíð og hækkaði sig frá 549,5 milljónum evra árið áður. Forskot Real Madrid á erkifjendurna í Barcelona minnkaði þó um 16,2 milljónir evra en Börsungar tóku stökk á listanum.

Barcelona hoppaði nefnilega úr fjórða sætinu og upp í annað sætið. Barca sendi Manchester United niður í þriðja sætið og Bayern München, sem var í þriðja sætinu, er nú í fimmta sæti. Barcelona hækkaði tekjur sínar á öllum sviðum því tekjur af miðasölu, sjónvarpstekjur og auglýsingatekjur hækkuðu.

Josep Maria Bartomeu, forseti Barcelona, hefur mikinn metnað fyrir framtíðarrekstur félagsins en hann er með stefnuna á því að velta milljarði evra árið 2021.

Barcelona vann spænsku deildina, spænska bikarinn og Meistaradeildina á þessu tímabili og velta félagsins fór upp um rúmar 76 milljónir evra eða frá 484,8 milljónum upp í 560,8 milljónir.

 

Manchester United datt niður í þriðja sæti þrátt fyrir að auka veltu sína lítillega en Deloitte telur allt eins líklegt að United fari upp í efsta sætið á listanum fyrir núverandi tímabil.

Níu af tuttugu hæstu félögunum á listanum spila í ensku úrvalsdeildinni og þar af eru fimm þeirra meðal þeirra tíu efstu. Ítalía á fjögur félög inn á topp tuttugu og þrjú spænsk og þýsk félög eru á listanum yfir best reknu félögin.

Mesta veltan hjá fótboltafélögum heimsins tímabilið 2014-15:

(Tölur frá 2013-14 innan sviga)

1. (1) Real Madrid (Spánn) 577 milljónir evra (549.5 milljónir evra)

2. (4) Barcelona (Spánn) 560,8 (484,8)

3. (2) Manchester United (England) 519,5 (518)

4. (5) Paris Saint-Germain (Frakkland) 480,8 (471,3)

5. (3) Bayern München (Þýskaland) 474 (487,5)

6. (6) Manchester City (England) 463,5 (416,5)

7. (8) Arsenal (England) 435,5 (359,3)

8. (7) Chelsea (England) 420 (387,9)

9. (9) Liverpool (England) 391,8 (305,9)

10. (10) Juventus (Ítalía) 323,9 (279)

11. (11) Borussia Dortmund (Þýskaland) 280,6 (261,5)

12. (13) Tottenham (England) 257,5 (215,5)

13. (14) Schalke 04 (Þýskaland) 219,7 (214)

14. (12) AC Milan (Ítalía) 199.1 (249,7)

15. (15) Atletico Madrid (Spánn) 187,1 (169,9)

16. (Nýtt) Roma (Ítalía) 180,4 (127,4)

17. (19) Newcastle (England) 169,3 (155,1)

18. (20) Everton (England) 165,1 (144,1)

19. (17) Internazionale (Ítalía) 164,8 (162,8)

20. (Nýtt) West Ham (England) 160,9 (139,3)