Welbeck: Við áttum að gera betur

Danny Welbeck, framherji Arsenal, var eðlilega súr þegar hann ræddi við BT Sport eftir 3-1 tap liðsins gegn Barcelona á Nývangi í kvöld.

Arsenal tapaði fyrri leiknum 2-0 og samanlagður sigur Evrópumeistaranna því 5-1. Arsenal var í erfiðum málum fyrir leikinn og ekki hjálpaði til að lenda 1-0 undir í kvöld.

„Við fengum tækifæri en það var alltaf erfitt að koma hingað 2-0 undir. Við vorum með leikáætlun en þetta var erfitt og því miður komumst við ekki áfram,“ sagði Welbeck.

„Við fengum nokkur færi þar sem við áttum að gera betur. Gæði Barcelona eru svo mikil að liðið nýtir þau færi sem það fær.“

„Maður vildi virkilega gera einhverja hluti þegar maður er mættur á Camp Nou. Við hefðum átt að gera betur og því er þetta svekkjandi,“ sagði Danny Welbeck.