OB burstaði Viborg

OB, lið Ara Frey Skúlasonar og Hallgríms Jónassonar, skellti í flugeldasýningu gegn Viborg í dönsku úrvalsdeildinni í knattspyrnu í dag.

Ari Freyr var tekinn af velli á 71. mínútu, en Hallgrímur stóð allan tímann vaktina í vörn liðsins í 5-1 sigri.

Rasmus Festersen og Rasmus Falk Jensen komu OB í 2-0 og þannig stóðu leikar í hálfleik.

Anders Jacobsen bætti við þriðja markinu í upphafi síðari hálfleiks, en Jeppe Curth minnkaði muninn fyrir Viborg.

Anders bætti við tveimur mörkum fyrir OB áður en yfir lauk og innsiglaði þrennu sína og stórsigur OB á TREFOR-leikvanginum, 5-1.

Eftir sigurinn er OB í sjötta sæti deildarinnar með 37 stig, en Viborg er í níunda sætinu með 30 stig.