Rúnar og Kristinn á sínum stað hjá Sundsvall | Glódís og stöllur hennar byrja illa

Rúnar Már Sigurjónsson og Kristinn Steindórsson voru báðir í byrjunarliði Sundsvall og léku allan tímann þegar liðið gerði 1-1 jafntefli við Kalmar á heimavelli í sænsku úrvalsdeildinni í fótbolta í kvöld.

Lars Christian Krogh Gerson kom Sundsvall yfir með marki af vítapunktinum á 42. mínútu en Marcus Antonsson jafnaði metin fyrir Kalmar 18 mínútum fyrir leikslok.

Sundsvall hefur byrjað tímabilið vel og situr í 3. sæti deildarinnar með 11 stig eftir sex umferðir.

Haukur Heiðar Hauksson sat allan tímann á varamannabekknum þegar AIK tapaði 2-1 fyrir Helsingsborg á útivelli.

Glódís Perla Viggósdóttir lék allan leikinn í vörn Eskilstuna sem tapaði 1-3 fyrir Linköpings á heimavelli í sænsku kvennadeildinni.

Eskilstuna rétt missti af meistaratitlinum í fyrra en hefur ekki byrjað tímabilið í ár nógu vel og aðeins fengið þrjú stig úr fyrstu þremur leikjum sínum.