FH-ingar og Blikar örugglega áfram í bikarnum

Pepsi-deildarlið FH og Breiðabliks áttu ekki í miklum vandræðum með að tryggja sér sæti í sextán liða úrslitum Borgunarbikars karla í kvöld. Það verða því níu Pepsi-deildarlið í pottinum á morgun.

FH-ingar skoruðu níu mörk í Kaplakrika á móti KF úr Fjallabyggð en staðan var 2-0 eftir fimmtán mínútur og 5-0 í hálfleik. Steven Lennon, Jeremy Serwy, Emil Pálsson og Pétur Viðarsson skoruðu allir tvö mörk fyrir FH-liðið í leiknum en enginn þeirra náði þrennunni.

Blikar þurftu að bíða í klukkutíma eftir fyrsta markinu í leik sínum á móti Kría á Valhúsahæðinni á Seltjarnarnesi en skoruðu þrjú á síðasta hálftímanum og tryggðu sér öruggan sigur.

Liðin níu úr Pepsi-deildinni sem eru komin áfram eru ÍBV, ÍA, Þróttur R., Víkingur R., Fylkir, Valur, Breiðablik, FH og svo annaðhvort lið Stjörnunnar og Víkings úr Ólafsvík sem eru enn að spila í Garðabænum.

Það eru því bara KR, Fjölnir og annaðhvort lið Stjörnunnar og Víkings úr Ólafsvík sem ná því ekki að spila bikarleik í júní þetta sumarið.

Úrslit úr leikjunum í kvöld í 32 liða úrslitum Borgunarbikarsins:

Kría - Breiðablik 0-3

0-1 Guðmundur Atli Steinþórsson (61.), 0-2 Ágúst Eðvald Hlynsson (70.), 0-3 Arnþór Ari Atlason (87.)

FH - KF 9-0    

1-0 Steven Lennon, víti (13.), 2-0 Emil Pálsson (15.), 3-0 Steven Lennon (24.), 4-0 Jeremy Serwy (30.), 5-0 Jeremy Serwy (37.), 6-0 Grétar Snær Gunnarsson (67.), 7-0 Emil Pálsson (74.), 8-0 Pétur Viðarsson (78.), 9-0 Pétur Viðarsson (88.).    

Stjarnan - Víkingur Ó.  2-2  (hófst klukkan 20.00 og er enn í gangi)

0-1 William Dominguez Da Silva (50.), 1-1 Jeppe Hansen (58.), 1-2 Pape Mamadou Faye (60.), 2-2 Guðjón Baldvinsson (88.)

Upplýsingar um markaskorara eru meðal annars fengnar frá ksi.is, fótbolti.net og úrslit.net.