Þrettán mörk Theu dugðu ekki til | Myndir

Valur vann sinn annan leik í röð í Olís-deild kvenna þegar liðið lagði Fylki að velli, 23-28, í Árbænum í kvöld.

Ernir Eyjólfsson, ljósmyndari Fréttablaðsins og Vísis, var í Fylkishöllinni og tók meðfylgjandi myndir.

Með sigrinum jafnaði Valur Hauka að stigum í 3. sæti deildarinnar. Fylkir er hins vegar áfram með tvö stig í 7. sæti en Árbæingar hafa aðeins unnið einn leik í vetur.

Thea Imani Sturludóttir fór mikinn í leiknum og skoraði 13 af 23 mörkum Fylkis sem var lengst af í eltingarleik.

Valskonur leiddu með tveimur mörkum í hálfleik, 11-13, og byrjuðu seinni hálfleikinn af miklum krafti. Diana Satkauskaite kom Val sex mörkum yfir, 12-18, þegar sjö mínútur voru liðnar af seinni hálfleik.

Fylkiskonur lögðu ekki árar í bát og náðu tvisvar að minnka muninn í eitt mark. En nær komust þær ekki, Valur seig fram úr á lokamínútum og vann að lokum fimm marka sigur, 23-28.

Satkauskaite var markahæst í liði Vals og skoraði 13 mörk, líkt og Thea. Kristín Guðmundsdóttir kom næst með fjögur mörk.

Mörk Fylkis:

Thea Imani Sturludóttir 13, Þuríður Guðjónsdóttir 3, Christine Rishaug 2, Vera Pálsdóttir 1, Hildur Björnsdóttir 1, Diljá Mjöll Aronsdóttir 1, Kristjana Björk steinarsdóttir 1.

Mörk Vals:

Diana Satkauskaite 11, Kristín Guðmundsdóttir 4, Díana Dögg Magnúsdóttir 3, Gerður Arinbjarnar 2, Íris Ásta Pétursdóttir 2, Eva Björk Hlöðversdóttir 2, Vigdís Birna Þorsteinsdóttir 1, Morgan Marie Þorkelsdóttir 1.