Leikmenn sænsku deildarinnar völdu Kára og Viðar Örn í lið ársins

Kári Árnason og Viðar Örn Kjartansson eru báðir í liði ársins í sænsku úrvalsdeildinni sem leikmenn deildarinnar völdu.

Kári og Viðar Örn áttu stóran þátt í því að Malmö varð sænskur meistari í ár.

Kári spilaði 24 af 30 deildarleikjum Malmö á tímabilinu og skoraði eitt mark. Malmö fékk á sig fæst mörk allra liða í sænsku deildinni, eða 26.

Viðar Örn skoraði 14 mörk í 20 deildarleikjum áður en hann var seldur Maccabi Tel Aviv í Ísrael. Viðar var næstmarkahæstur í sænsku deildinni þrátt fyrir að hafa misst af þriðjungi leikjanna.

Malmö á alls fimm fulltrúa í liði ársins en auk Kára og Viðars Arnar eru markvörðurinn Johan Wiland og miðjumennirnir Magnus Eikrem og Andreas Christiansen í liðinu.

Lið ársins í Svíþjóð er þannig skipað:

Markvörður: Johan Wiland, Malmö FF

Vörn: Linus Wahlqvist, IFK Norrköping, Kári Árnason, Malmö FF, Andreas Johansson, IFK Norrköping, Emil Salomonsson, IFK Göteborg

Miðja: Magnus Eikrem, Malmö FF, Ebenezer Ofori, AIK, Rasmus Elm, Kalmar FF, Andreas Christiansen, Malmö FF

Sókn: Alexander Isak, AIK, Viðar Örn Kjartansson, Malmö FF