Arnór skoraði gegn toppliðinu | Langþráður sigur Sundsvall

Arnór Smárason skoraði mark Hammarby í 1-1 jafntefli við topplið Malmö í sænsku úrvalsdeildinni í fótbolta í kvöld.

Þetta var þriðja mark Skagamannsins á tímabilinu en hann hefur auk þess gefið eina stoðsendingu í níu deildarleikjum. Arnór lék allan leikinn líkt og Ögmundur Kristinsson en Birkir Már Sævarsson lék ekki með Hammarby í kvöld.

Hammarby er í 7. sæti deildarinnar með 13 stig.

Eftir fimm jafntefli í röð og sjö leiki án sigurs vann Sundsvall langþráðan sigur á Örebro, 0-2.

Kristinn Steindórsson var í byrjunarliði Sundsvall en nafni hans Freyr Sigurðsson var ekki með í kvöld. Sundsvall er í 10. sæti deildarinnar.

Hjörtur Logi Valgarðsson sat allan tímann á varamannabekk Örebro sem er í 13. sæti.