Samdráttur í áfengisneyslu í heiminum

Neysla á áfengi hefur dregist saman á heimsvísu á milli ára samkvæmt nýrri skýrslu áfengisiðnaðarins. Minni bjórdrykkja er aðalorsök samdráttarins.

Skýrsla Alþjóðlegu vín- og áfengisskrárinnar (International Wine and Spirits Record) sýnir að áfengisiðnaðurinn í heiminum dróst saman um 1,3% árið 2016. Bjórsala dróst saman um 1,8% milli ára.

Áfengissala hefur dregist saman um 0,3% að meðaltali undanfarin fimm ár og sker samdrátturinn nú sig því verulega úr samkvæmt frétt BBC.

Hagvöxtur mældist 3,5% á heimsvísu í fyrra en aukin áfengisneysla hefur yfirleitt haldist í hendur við aukin efnahagsleg umsvif. Stór ríki eins og Kína, Rússland og Brasilía urðu hins vegar fyrir kælingu eða samdrætti í efnahagslífinu í fyrra. Bjórsala dróst saman í löndunum þremur um 4,2-7,8%.