Dollarinn tekið dýfu í forsetatíð Donalds Trump

Frá því að Donald Trump Bandaríkjaforseti sór embættiseið í janúar hefur gengi Bandaríkjadals lækkað verulega. Á miðvikudaginn náði dollarinn fimmtán mánaða lægð samtímis því að Dow Jones hlutabréfavísitalan náði methæð.

CNN greinir frá því að gengi Bandaríkjadals hafi hækkað frá því að Trump var kosinn og þar til hann tók við embætti og náð meðal annars 14 ára hæð þegar útlit var fyrir að Trump myndi lækka fyrirtækjaskatta og ýta undir hagvöxt. Búist var við að Trump og bandaríska þingið myndu hafa þau áhrif að bandaríski seðlabankinn hækkaði stýrivexti hraðar en áður.

Trump hefur hins vegar ekki náð mörgum stefnumálum sínum í gegn á fyrstu sex mánuðum í embætti. Einnig hefur hagvöxtur í Evrópu haft neikvæð áhrif á þróun gengis Bandaríkjadals. Dollaravísitalan þar sem dollarinn er borinn saman við aðrar helstu myntir heimsins hefur lækkað um tíu prósent síðan í byrjun janúar. Gengið hefur lækkað í hverjum mánuði fimm mánuði í röð og hefur slíkt ekki gerst síðan árið 2011.