Hlutabréf í Snapchat í sögulegri lægð

Gengi hlutabréfa í Snap, móðurfélagi samfélagsmiðilsins Snapchat, hefur lækkað um rúmlega 12 prósent í dag í viðskiptum eftir lokun markaða. Gengi bréfanna er í sögulegu lægð.

Breska ríkisútvarpið greinir frá því að rekja megi þessa lækkun til þess að fyrirtækið tilkynnti í gær að tap á síðasta ársfjórðungi hefði numið 400 milljónum dollara, eða 42 milljörðum króna.

Um 173 milljónir manna nota daglega snapchat og hefur notendafjöldinn aukist um 4 prósent milli fjórðunga. Þrátt fyrir það á fyrirtækið undir högg að sækja frá samkeppnisaðilum á borð við Facebook sem býður svipaða þjónustu.

Gengi Snap er nú um 12 dollarar en var 17 dollarar þegar félagið var skráð á markað í mars síðastliðnum.