Bróðir Pablo Escobar ráðleggur Netflix að ráða launmorðingja öryggisins vegna

Sjónvarpsveitan Netflix ætti að ráða launmorðingja til að tryggja öryggi starfsmanna þeirra. Þetta segir bróðir eiturlyfjabarónsins fallna, Pablo Escobar, í viðtali við Hollywood Reporter vegna frétta af manni sem var drepinn nærri Mexíkó-borg í leit að tökustöðum fyrir þáttaröðina Narcos.

Narcos, glæpaþáttaröð úr smiðju Netflix, hefur slegið í gegn meðal áskrifenda efnisveitunnar en serían fjallar um ævi og störf kólumbíska eiturlyfjabarónsins Pablo Escobar.

Maðurinn, Carlos Munoz Portal, var 37 ára gamall. Hann fannst í bíl sínum í bænum Temascalapa í Mexíkó en lík hans var alsett byssukúlum. Munoz starfaði sem verktaki við framleiðslu fjórðu Narcos-þáttaraðarinnar sem sögð er munu einblína á mexíkóska Juárez-eiturlyfjahringinn.

Bróðir Escobar, Roberto De Jesus Escobar Gaviri, var bæði aðalendurskoðandi bróður síns og yfirmaður launmorðingja hans sem voru á vegum Medellin-glæpahringsins.

Roberto er í dag forstjóri Escobar Inc., en hann heldur því fram að hann eigi réttinn að nafni Escobar. Hann telur því Netflix skulda sér einn milljarð Bandaríkjadala, eða sem nemur um 105 milljörðum íslenskra króna miðað við gengi dagsins í dag, fyrir notkun á nafni fjölskyldu hans án leyfis.

Í viðtalinu við Hollywood Reptorter er Roberto spurður hvað Netflix ætti að gera til að auka öryggi starfsfólks síns. Svarið hans er á þann veg að búi einstaklingur yfir nógu miklum gáfum, þá þurfi hann ekki vopn. „Ef ekki, þá þarftu vopn. Í þessu tilviki ætti Netflix að ráða launmorðingja til að tryggja öryggi.“

Hann er spurður álits á því hvort Netflix ætti að mynda þáttaraðir sínar á þeim stöðum sem atburðirnir áttu sér. Roberto segist ekki kæra sig um það, og þá sérstaklega ekki án leyfis Escobar Inc.

„Það er mjög hættulegt, sérstaklega án okkar blessunar. Þetta er landið mitt,“ segir hann og á þar við Kólumbíu, en Escobar-fjölskyldan er þaðan.