Lið íslensku stelpnanna í neðstu sætunum

Birna Berg Haraldsdóttir skoraði fimm mörk er lið hennar, Aarhus United, varð að sætta sig við tap, 21-24, gegn Randers.

Birna Berg var markahæst í sínu liði en þurfti tólf skot til þess að ná mörkunum fimm. Aarhus er aðeins með eitt stig eftir fjóra leiki í dönsku deildinni.

Eva Björk Davíðsdóttir var í liði Ajax Köbenhavn er liðið tapaði á útivelli, 26-19, gegn Ringköbing.

Eva tók þrjú skot í leiknum en ekkert þeirra fór í netið. Ajax er án stiga í neðsta sæti deildarinnar.

Örn Ingi Bjarkason komst svo ekki á blað hjá Hammarby er liðið vann Alingsås. Hammarby siglir lygnan sjó í sænsku úrvalsdeildinni.