Þessir strákar hafa unnið meira en þriðjung allra sigurleikja Íslands í sögu HM og EM

Þeir voru aðeins 90 mínútum frá því að komast á Heimsmeistaramótið í Brasilíu fyrir fjórum árum og sjokkið var svo mikið að það sást á leik lykilmanna landsliðsins langt fram eftir tímabilinu.

Þarna í nóvembermánuði 2013 var íslenska landsliðið komið inn á topp fimmtíu á styrkleikalista FIFA og hafði aldrei áður verið nær því að komast inn á stórmót.

Nei, toppnum var ekki náð

Margir fróðir menn töldu toppinum vera kannski náð og að litla Ísland myndi aldrei komast nær því að spila á HM eða EM. Það sem fáir vissu þá en allir í dag er að þetta eru engir venjulegir karakterar. Áfallið var vissulega mikið fyrir fjórum árum en liðið var ekkert á því að gefa eftir. Þeir voru ungir enn og vissu að fleiri tækifæri myndu bjóðast.

Íslenska liðið vann fyrstu þrjá leiki undankeppni EM 2016 þar af þann síðasta 2-0 á móti bronsliði Hollendinga frá heimsmeistaramótinu sem þeir voru svo nálægt því að komast á. Eftir sigur á Tékkum í júní var liðið í dauðafæri að komast á stórmót í fyrsta sinn og eftirminnilegur sigur á Hollendingum í Amsterdam nánast gulltryggði EM-sætið.

Heilluðu allan heiminn



Strákarnir voru ekkert sáttir við bara að komast á EM og mættu þangað til að ná árangri. Áður en við vissum voru bæði leikmenn og stuðningsfólkið búin að heilla allan heiminn og Ísland komið í átta liða úrslit á sínu fyrsta EM.

Aftur freistuðust einhverjir til að efast um að nú væri toppinum náð. Lars Lagerbäck ætlaði að skilja Heimi Hallgrímsson einan eftir og liðið lenti í mjög erfiðum riðli í undankeppni HM 2018. Það var því ekkert allt of bjart útlit um miðjan seinni hálfleik á heimavelli á móti Finnlandi þegar liðið var 2-1 undir. Tvö mörk í uppbótartíma tryggðu öll þrjú stigin og íslenska liðið sundurspilaði Tyrki á sama stað í leiknum á eftir.

Aftur var það eftirminnilegur sigur á sterkri þjóð (nú Króötum) í júníbyrjun sem kom íslenska liðinu í dauðafæri á að komast á HM í fyrsta sinn og þrátt fyrir óvænt tap í Finnlandi í fyrsta leik haustsins tryggði íslenska liðið sér sögulegt HM-sæti með því að vinna þrjá síðustu leikina sína í riðlinum með markatölunni 7-0.

Síðan Aron Einar Gunnarsson tók við fyrirliðabandinu og íslenska liðið mætti í sína fyrstu undankeppni með þennan kjarna í aðalhlutverki hefur Ísland unnið alls átján leiki í undankeppni og bætt metið yfir sigurleiki í undankeppni þrisvar sinnum. Íslenska landsliðið tók fyrst þátt í undankeppni fyrir stórmót árið 1957 og hafði fram að undankeppni HM 2014 „aðeins“ unnið 34 af 169 leikjum sínum í undankeppni HM og EM. Það gerir 20 prósent leikjanna.

Átján sigrar á sex árum



Í síðustu þremur undankeppnum hefur íslenska liðið unnið 18 af 32 leikjum sínum eða 56 prósent leikjanna. Þessir átján sigrar á sex árum eru nú meira en þriðjungur allra sigurleikja íslenska karlalandsliðsins í undankeppnum HM og EM frá upphafi og frá haustmánuðum 2011 hefur þetta landslið okkar í dag unnið 53 prósent þeirra sigurleikja sem íslenska landsliðið vann á árunum fyrstu 53 árum sínum í undankeppnum stórmóta (1957 til 2010).

Nú tekur bara við bið. Fyrst bið eftir því að dregið verði í riðla 1. desember og svo meira en sex mánaða bið eftir fyrsta leik á HM í Rússlandi. Strákarnir okkar þurfa að haldast heilir á þessum tíma og geta vonandi mætt hundrað prósent klárir í lokaundirbúninginn næsta vor. Draumurinn um að spila á HM er orðinn að veruleika en þessir landsliðsstrákar eru ekkert hættir því að skrifa íslensku fótboltasöguna.

Ísland í undankeppnum HM og EM 1957-2017

Á árunum 1957 til 2010

22 undankeppnir

34 sigrar í 169 leikjum

20 prósent leikja unnust

Markatalan: -184

Besti árangur í riðlakeppni

3. sæti HM 1994 og EM 2004



Á árunum 2011 til 2017

3 undankeppnir

18 sigrar í 32 leikjum

56 prósent leikja unnust

Markatalan: +20

Besti árangur í riðlakeppni

1. sæti HM 2018

2. sæti EM 2016 og  HM 2014