Bandarískir auðmenn vilja hærri skatta

Yfir 400 bandarískir milljónamæringar og milljarðamæringar hafa í bréfi til bandaríska þingsins hvatt Repúblikanaflokkinn til að hverfa frá áætlununum um að lækka skatta hjá þeim sem ríkastir eru.

Hópurinn, Responsible Wealth, segir slíkar áætlanir auka á ójöfnuð og auka skuldir. Í staðinn eigi að hækka skatta hjá þeim efnameiri. Meðal þeirra sem hafa undirritað bréfið eru læknar, lögmenn, frumkvöðlar og forstjórar.

Donald Trump Bandaríkjaforseti og þingmenn Repúblikanaflokksins hafa sagt að skattalækkanir hjá þeim efnameiri stuðli að innspýtingu í efnahagskerfið og auki fjárfestingar.