Morðingi hins unga James Bulger í fangelsi í þriðja sinn

Jon Venables, annar tveggja drengja, sem myrtu hinn tveggja ára James Bulger, árið 1993 hefur verið handtekinn vegna vörslu á barnaklámi. Myndefnið fannst í tölvu Venables í reglubundinni heimsókn frá skilorðsfulltrúum en svipað atvik átti sér stað árið 2010 og var hann líka fangelsaður þá. Sky greinir frá þessu.

Myrtu hinn tveggja ára James Bulger

Venables og skólabróðir hans Robert Thompson komust í fréttirnar árið 1993 þegar þeir námu á brott, pyntuðu og myrtu hinn tveggja ára James Bulger í Bootle bæ, nálægt Merseyside í Bretlandi. Málið vakti mikinn óhug hjá þjóðinni og voru þeir piltar dæmdir til fangelsisvistar. Þeim var sleppt árið 2001 með ný persónuskilríki og nöfn.

Denise Fergus, móðir Bulgers, tísti árið 2010: „Byrjar þetta aftur,“ þegar Venables var fundinn sekur með vörslu barnakláms í fyrsta skipti. Stuart, eiginmaður hennar, tísti síðan aftur á dögunum: „Þú sagðir þetta alltaf...7 árum seinna...“

Fergus hefur einnig gefið það út að Venables, sem átti frumkvæðið að morðinu, hefði átt að fá þyngri refsingu þrátt fyrir að hann hafi einungis verið 10 ára. Hún kallaði hann tifandi tímasprengju og sagði að veita þyrfti þyngri dóma til þess að koma í veg fyrir að svona fólk kæmist upp með glæpi sína.