Segir mótmælin fyrir utan heimili Steinunnar Valdísar ekki mistök

„Það eru engin mistök að beita lýðræðislegum og stjórnarskrárvörðum réttindum til að mótmæla og tjá hug sinn,“ segir Björn Þorri Viktorsson, lögmaður og og einn þeirra sem komu að mótmælum fyrir utan hús Steinunnar Valdísar Óskarsdóttur, þáverandi þingmanns Samfylkingarinnar, vorið 2010.

Mikil umræða hefur sprottið upp eftir frásögn Steinunnar Valdísar í Silfrinu um helgina. Tjáði hún sig þar um mótmælin sem boðað var til vegna styrkja sem hún þáði á árunum 2006 og 2007.

Sagði Steinunn Valdís einnig frá því að þjóðþekktir karlmenn hefðu hvatt aðra til að nauðga henni á meðan á mótmælum stóð.

Björn bætir við að honum þyki að það sé verið að skrifa söguna upp á nýtt að einhverju leyti.

„Það gleymist aðeins í umræðunni að í fyrsta lagi sagði Steinunn Valdís af sér og baðst afsökunar. Í kjölfarið voru settar reglur sem útiloka að svona hlutir geti gerst,“ segir Björn og á við styrkveitingarnar.

Hann sé ekki viss um að þetta hefði gerst ef almenningur hefði ekki fylgt málinu eftir.

„Auðvitað stóð aldrei til af minni hálfu að meiða nokkurn eða, eins og Steinunn Valdís lýsir því núna, hafa svona gríðarleg áhrif á hana,“ segir Björn. Það sé eitthvað sem hafi komið honum á óvart og hafi aldrei verið tilgangurinn.

„Ég ætla ekki að fara að skatt­yrðast við Steinunni Valdísi eða fólk sem hefur verið að tjá sig fyrir hennar hönd. Ég er ekkert á leiðinni þangað,“ segir Björn sem lítur ekki svo á að gerð hafi verið mistök með umræddum mótmælum.

Sveinn Margeirsson, forstjóri Matís, sem einnig kom að mótmælunum, er á öndverðum meiði.

„Ég held það sé mikilvægt að menn dragi lærdóm af þessu rétt eins og ég vona að við höfum lært af hruninu. Til að mynda eru styrkir til fólks í stjórnmálum núna uppi á borðinu sem var auðvitað síður á þessum tíma.“

Sveinn segir að það að mótmæla fyrir utan heimili Steinunnar Valdísar hafi verið röng leið.

„Jafnvel þótt aðstæðurnar hafi verið öfgafullar á þessum tíma. Ég hef beðið hana afsökunar og myndi ekki gera þetta í núverandi stöðu, og ekki hvetja neinn til þess.“

Mótmælt var fyrir utan heimili fleiri stjórnmálamanna á sama tíma, þó ekki jafnharkalega og í tilfelli Steinunnar Valdísar. Segir Sveinn að þau mótmæli hafi einnig verið röng.

Guðlaugur Þór Þórðarson utanríkisráðherra er einn þeirra sem fengu mótmælendur upp að dyrum. „Það var náttúrulega langmest álagið á fjölskylduna. Sérstaklega börnin,“ segir Guðlaugur.

„Þess ber þó að geta að þetta var ekki í neinu samræmi við það sem Steinunn Valdís lenti í. Það var svo miklu, miklu meira hjá henni,“ segir Guðlaugur aukinheldur.

Einnig var mótmælt fyrir utan heimili Þorgerðar Katrínar Gunnarsdóttur, formanns Viðreisnar, á þessum tíma. Hún vill ekki tjá sig um málið.

Sjálf segist Steinunn Valdís hafa fengið hundruð skilaboða og símtala eftir frásögn sína. Hún sé þakklát fyrir þann stuðning sem henni hafi verið sýndur.