Vonarfjall reyndist hæst

Nýjar mælingar vísindamanna hafa leitt í ljós að Mount Hope, sem íslenska mætti sem Vonarfjall, er hæsta fjall breska heimsveldsins.

Fjallið, sem rís upp úr landssvæðinu sem Bretar gera tilkall á Suðurskautinu, reyndist vera um 50 metrum hærra en Mount Jackson sem talið hefur verið hæst til þessa.

Vonarfjall er alls um 3239 metrar á hæð en Jackson 3184 er fram kemur á vef breska ríkisútvarpsins. Mount Jackson er jafnframt á Suðurskautinu.

Ákveðið var að ráðast í hinar nýju mælingar til að slá á ótta flugmanna sem hafa lýst áhyggjum af öryggi sínu er þeir fljúga yfir Hvítu heimsálfuna.

„Það eru engir vegir á Suðurskautinu svo að við verðum að fljúga - og ef þú ert að fljúga flugvélum þá er mjög mikilvægt að vita hvar fjöllin eru og hvað þau eru há,“ útskýrir Dr. Peter Fretwell í samtali við BBC.

Talið er að rekja megi nokkur flugslys sem orðið hafa á Suðurskautinu á síðustu árum til lélegra korta. Hinar nýju mælingar varpa ekki aðeins skýrara ljósi á hæð fjalla heimsálfunnar heldur hafa mörg fjöll verið „færð“ til að samsvara betur raunveruleikanum - sum um næstum 5 kílómetra.

Mount Vinson, um 4892 metrar á hæð, er þó áfram langhæsti tindur heimsálfunnar.