Brenndi fangamark sitt í lifur sjúklinga

Breskur skurðlæknir sem brenndi fangamerk sitt í lifur sjúklinga í líffæraskiptiaðgerðum hefur verið dæmdur til að greiða sekt og til að sinna samfélagsþjónustu. Saksóknari segir að málið sé fordæmalaust í sakamálasögu Bretlands.

Simon Bramhall játaði sig sekan af ákæru í tveimur liðum í síðasta mánuði. Hann var sakaður um að hafa beitt tæki sem vanalega er notað til að loka blæðandi æðum til að brennimerkja líffærin með upphafsstöfum sínum, að sögn AP-fréttastofunnar.

Hann lét af störfum við Sjúkrahús Elísabetar drottningar í Birginham árið 2014 þegar annar læknir uppgötvaði brot hans. Sjúkrahúsið fullyrðir að aðfarir læknisins hafi ekki haft nein áhrif á árangur aðgerðanna.

Dómarinn í málinu sagði að hroki Bramhall hafi gengið svo langt að hann hafi orðið glæpsamlegur. Þrátt fyrir að sjúklingarnir hafi ekki orðið fyrir líkamlegum skaða hafi þeir orðið fyrir sálrænu áfalli þegar þeir komust að því hvað læknirinn hafði gert.

Bramhall þarf að greiða 10.000 punda sekt, jafnvirði um 1,4 milljóna króna.