Mannskæðasti bruni í Suður-Kóreu í áratug

Að minnsta kosti fjörutíu og einn er látinn og rúmlega sjötíu slasaðir eftir mikinn bruna sem kom upp á sjúkrahúsi í Suður-Kóreu í nótt.

Svo virðist sem eldurinn hafi blossað upp á bráðadeild spítalans, sem er í borginni Miryang, en um 200 sjúklingar voru inni í byggingunni. Borgin er um 270 kílómetra suðaustur af höfuðborginni Seúl.

Þetta er mannskæðasti bruni í Suður-Kóreu í áratug og óttast er að tala látinna eigi eftir að hækka enn frekar, þar sem margir hinna slösuðu eru í alvarlegu ástandi.

Flestir hinna látnu virðast hafa dáið úr reykeitrun, að því er slökkviliðsmenn á staðnum segja í samtali við Yonhap fréttastofuna.

Eldsupptök eru enn ókunn að sögn slökkviliðsstjórans Choi Man-woo. „Hinir látnu höfðu verið á spítalanum og á samliggjandi dvalarheimili. Einhverjir létust þegar var verið að flytja þá á annað sjúkrahús,“ segir slökkviliðsstjórinn. Hann bætir við að eldurinn hafi komið upp um klukkan 07:30 að staðartíma og að um þrjár klukkustundir hafi tekið að slökkva eldinn.

Slökkviliðsmönnum tókst að bjarga rúmlega 90 manns af dvalarheimilinu áður en það varð eldinum að bráð.

Forseti Suður-Kóreu, Moon Jae-in, boðaði til neyðarfundar í ríkisstjórn sinni þar sem næstu skref voru rædd. Fjölmargir embættismenn fóru til borgarinnar og vottuðu aðstandendum samúð sína.