Fjölnir kom til baka í Reykjaneshöllinni

Keflavík og Fjölnir skildu jöfn í A-riðli Lengjubikars karla í kvöld, en leikurinn endaði með 2-2 jafntefli eftir að Keflavík hafði komist í 2-0.

Keflavík byrjaði betur og komst yfir á 39. mínútu með marki frá Jeppe Hansen. Heimamenn leiddu með einu marki í leikhléi. Þeir tvöfölduðu svo forystuna á 69. mínútu og útlitið gott fyrir þá.

Ísak Óli Helgason minnkaði hins vegar muninn fyrir Fjölni í sínum fyrsta leik eftir að hafa gengið í raðir liðsins frá HK og Þórir Guðjónsson jafnaði í uppbótartíma úr vítaspyrnu.

Þetta var fyrsti leikur Fjölnis í mótinu, en annar leikur Keflavíkur. Keflavík tapaði 1-0 fyrir Stjörnunni á dögunum í Reykjaneshöllinni.