Ragnheiður nýr framkvæmdastjóri Íslenska dansflokksins

Ragnheiður Skúladóttir hefur verið ráðin framkvæmdastjóri Íslenska dansflokksins.

Í tilkynningu segir að Ragnheiður sé vel kunnug menningarheiminum enda hafi hún verið deildarforseti sviðslistadeildar LHÍ frá 2000 til 2011 og leikhússtjóri Leikfélags Akureyrar frá 2012 til 2015.

„Árið 2008 stofnaði Ragnheiður, ásamt öðrum, sviðslistahátíðina LÓKAL þar sem hún er enn þann dag í dag listrænn stjórnandi ásamt Bjarna Jónssyni,“ segir í tilkynningunni.

Haft er eftir Ragnheiði að það sé sér mikil ánægja að halda áfram störfum fyrir dansflokkinn en þar hafi hún gengt stöðu framkvæmdarstjóra í afleysingum undanfarið ár. „Ég hef löngum sóst eftir því að starfa þar sem áræðni og frumsköpun er höfð að leiðarljósi og það er svo sannarlega raunin hjá Íslenska dansflokknum,“ segir Ragnheiður.

Hún tekur við starfinu af Kristínu Ögmundsdóttur, sem nýverið var ráðin framkvæmdastjóri Borgarleikhússins.