Ekkert lið hefur byrjað betur en Grindavík undanfarin tvö sumur

Strákarnir hans Óla Stefáns Flóventssonar eru annað árið í röð að byrja Pepsi-deild karla í fótbolta af miklum krafti en líkt og í fyrra er Grindavíkurliðið með jafnmörg stig og topplið deildarinnar eftir fyrstu sex umferðirnar.

Grindavík var með 13 stig í fyrstu sex umferðunum í fyrra eins og lið Stjörnunnar og Vals.

Í ár hafa Grindvíkingar náð í 11 stig í fyrstu sex umferðunum eða jafnmörg stig og Breiðablik og FH en þessi lið eru með jafnmörg stig í 1. til 3. sæti deildarinnar.

Ef við leggjum saman fyrstu sex umferðirnar í Pepsi-deildinni undanfarin tvö sumur þá hefur ekkert lið í deildinni gert betur en Grindavík.

Grindavíkurliðið hefur unnið 7 af þessum 12 leikjum og aðeins tapað tveimur leikjum í 1. til 6. umferð 2017-18. Markatala liðsins er 17-12 eða +5.

Traustur varnarleikur á mikið í þessum árangri Grindavíkurliðsins enda er liðið aðeins í 6. sæti yfir flest mörk skoruð í þessum umferðum. Ekkert þeirra liða sem hafa spilað bæði tímabilin í deildinni hefur aftur á móti fengið á sig færri mörk.

Eina tapið í sumar kom á móti FH og eina tapið í fyrra kom á móti Víkingi úr Ólafsvík.

Grindvíkingar hafa náð tveimur stigum meira í þessum umferðum en Valsmenn og fjórum stigum meira en Stjarnan, FH og Breiðablik.

Flest stig í 1. til 6. umferð Pepsi-deildar karla 2017-2018:

1. Grindavík 24 stig (+5)

2. Valur 22 stig (+6)

3. Stjarnan 20 stig (+9)

4. FH 20 stig (+6)

5. Breiðablik 20 stig (+3)

6. KA 16 stig (+3)

7. KR 16 stig (+1)

8. Fjölnir 16 stig (-2)

9. Víkingur R. 13 stig (-2)

10. ÍBV 12 stig (-9)

ÍA (3 stig), Víkingur Ó. (3 stig), Fylkir (8 stig) og Keflavík (2 stig) spiluðu bara annað af þessum tveimur tímabilum í deildinni.