Nýjar skýrslur draga upp dökka mynd af horfum eftir Brexit

Tvær nýjar skýrslur draga upp dökka mynd af efnahagshorfum Bretlands eftir formlega úrsögn úr Evrópusambandinu á næsta ári.

Í fyrsta lagi er um að ræða nýja hagspá frá Verslunarráði Bretlands sem bendir til þess að hagvöxtur á þessu ári og því næsta verði enn minni en fyrri spár gerðu ráð fyrir. Spáin fyrir 2018 fer úr 1,4% niður í 1,3% og 2019 úr 1,5% í 1,4%. Hægja muni á fjárfestingum á þessu tímabili og skuldir heimilanna verði áfram háar.

Verslunarráðið segir að helsta ástæðan fyrir þessu sé verra útlit en áður hvað varðar lífið eftir Evrópusambandið. Tíu árum eftir fjármálahrunið mikla standi Bretland aftur frammi fyrir erfiðleikatímabili og veikum hagvexti í fyrirsjáanlegri framtíð.

Þá er það skýrsla frá ráðgjafafyrirtækinu Oliver Wyman sem sýnir að hagur bæði almennings og fyrirtækja muni versna – sama hvaða lendingu ríkisstjórnin nær í samningum við Evrópusambandið.

Bresk stjórnmál eru heltekin af umræðunni um úrsögnina, eða Brexit eins og hún er gjarnan nefnd. Theresa May forsætisráðherra hefur lagt allt undir í samningaviðræðum og hennar pólitíska framtíð veltur alfarið á því hversu vel eða illa úrsögnin gengur fyrir sig.

Skýrslan bendir til þess að allt hennar starf sé meira og minna unnið fyrir gíg, hún geti í besta falli mildað höggið.

Ríkisstjórn May virðist vera í nokkurri afneitun hvað þetta varðar og hefur meira að segja gengið svo langt að lofa aukafjárfestingu í heilbrigðiskerfinu.

Peningarnir eiga að koma frá öllu því hagræði sem felist í að standa utan ESB, enginn hefur hins vegar sýnt fram á slíkt hagræði með sannfærandi hætti. Í það minnsta ekki til skemmri tíma.

Í skýrslu Wyman segir að ef Bretlandi segi skilið við Evrópusambandið í mars á næsta ári án þess að neinir sérstakir tollasamningar taki strax gildi muni það kosta hvert breskt heimili jafngildi 140 þúsund króna á ársgrundvelli.

Eftir að breskir kjósendur kusu úrsögn úr Evrópusambandinu í þjóðaratkvæðagreiðslu hafa ýmsar blikur verið á lofti í efnahagslífinu. Bretland féll úr fimmta í sjötta sæti á lista yfir stærstu hagkerfi heims og hagvöxtur var aðeins 0,1% á fyrsta ársfjórðungi þessa árs.

Breska pundið lækkaði um 14% strax eftir þjóðaratkvæðagreiðsluna og verðbólga jókst að sama skapi á meðan laun standa í stað.

Evrópa er eftir sem áður langstærsti útflutningsmarkaður Breta.