Hannes: Pressan var öll á Messi enda að skjóta á 34 ára gamlan leikstjóra

„Það eru nokkur drauma augnablik sem að maður er með í hausnum þegar að maður fer inn í eitthvað eins og heimsmeistarakeppni. Vinirnir og fjölskyldan eru öll búin að tala um þetta, að verja víti frá Messi.“

Þetta sagði Hannes Þór Halldórsson, markvörður íslenska landsliðsins í fótbolta, skælbrosandi við Vísi rétt áður en að hann steig upp í rútu á Spartak-vellinum í gær og hélt áleiðis í flug heim með strákunum okkar.

Hannes var maður leiksins í gær þegar að Ísland gerði 1-1 jafntefli við tvöfalda heimsmeistara Argentínu í fyrsta leik liðsins á HM 2018. Eins og heimsbyggðin veit varði Breiðhyltingurinn vítaspyrnu frá Lionel Messi sem á endanum tryggði okkar mönnum eitt stig.

Frábær tölfræði

„Auðvitað vill maður helst ekki lenda í því að fá á sig víti því við erum að reyna að ná úrslitum en svo þegar að dómarinn er búinn að flauta er næsta mál að Messi er að fara að skjóta. Þá hugsaði ég bara: OK, þetta er að fara að gerast. Ég ætla að taka þetta víti,“ sagði Hannes.

Markvörðurinn magnaði, sem er nú búinn að verja samtals 21 skot frá Cristiano Ronaldo og Lionel Messi í tveimur leikjum á stórmótum, er með magnaða tölfræði þegar kemur að því að verja vítaspyrnur. Hann hefur fengið 24 á sig í deildarleikjum og landsleikjum og aðeins 15 hafa farið inn.

„Það er góð tölfræði en ég veit ekki hvort þetta séu allt varin víti. Stangirnar eru stundum með mér í liði. Ég hef alltaf verið með sterka vítatölfræði. Ég er reyndar ekki búinn að verja nógu mörg víti í ár en nú eru komin tvö í röð,“ segir Hannes sem hélt Randers upp í dönsku úrvalsdeildinni m.a. með því að verja víti á ögurstundi.

„Vítaspyrnur hafa alltaf hentað mér vel. Ég er pressulaus í vítum sem markvörður og er með stóran faðm og yfirleitt hefur mér gengið vel að verja vítaspyrnur,“ segir hann.

Pressulaus

Hannes í raun naut þess að undirbúa sig fyrir vítaspyrnuna eftir að pólski dómarinn var búinn að blása í flautu sína. Það var aldrei séns að Hannesi yrði kennt um eitt eða neitt. Hann hafði allt að vinna.

„Öll pressa í heiminum var á Messi þegar að hann var að fara að sparka á einhvern 34 ára gamlan leikstjóra og kvikmyndagerðarmann eins og ég las á Twitter. Ég fæ þarna upp í hendurnar eina af eftirminnilegustu stundum lífs míns,“ segir Hannes.

„Fyrir mig var allt að vinna. Það var samt pressa því ætlum okkur hluti hérna. Þetta var dauðafæri fyrir þá að komast yfir og við vorum í basli á þessum tímapunkti.“

„Þetta er það sem að mann hefur dreymt um þannig að maður var kannsi 90 prósent svekktur og 10 prósent ekki svekktur þegar að vítaspyrnan var dæmd,“ segir Hannes Þór Halldórsson.

Vísir er með öflugt teymi í Rússlandi sem verður með ítarlegan fréttaflutning af íslenska liðinu á HM. Fylgist með á samfélagsmiðlum okkar - á Facebook, Twitter og Instagram.