Trylltist eftir samstuð við rútu

Lögregla í Washington í Bandaríkjunum leitar nú að ökumanni sem trylltist eftir að hafa lent í samstuði við rútu. Ökumaðurinn, ung kona, keyrði ítrekað á rútubílstjórann sem reyndi að hefta för hennar eftir áreksturinn.

Í frétt NBC Washington segir að konan hafi svínað á rútunni með þeim afleiðingum að bíllinn og rútan rákust saman.

Segir í fréttinni að konan hafi misst stjórn á skapi sínu eftir að rútubílstjórinn sagði að hún væri „brjálaður ökumaður“. Í myndbandi sem sjá mér að neðan og tekið var á vettvangi má sjá hvernig konan mölvar rúðu í rútunni.

Sest hún því næst upp í bíl sinn og ógnar ökumanni rútunnar sem tekið hafði sér stöðu fyrir framan bíl hennar á meðan hann hringdi á lögreglu.

Sjá má hvernig konan hótar því að keyra á rútubílstjórann áður en hún stígur bensíngjöfina í botn með þeim afleiðingum að rútubílstjórinn kastast upp á bíl hennar áður en hann kastast af honum eftir nokkra vegalengd.

Lögregla segist hafa upplýsingar um hver ökumaður bílsins sé og er leit að ökumanninum hafin.