Jón Ásgeir var einn stærsti eigandi Glitnis á árinu 2008 þegar þau meintu brot sem Aurum-málið snýst um voru framin. Hann var ákærður, og svo sýknaður í héraði, fyrir hlutdeild í umboðssvikum sem áttu sér stað í kringum sex milljarða króna lán Glitnis til félagsins FS38 vegna kaupa þess á 25,7 prósent hlut Fons í bresku skartgripakeðjunni Aurum Holdings Limited. Bæði FS38 og Fons voru í eigu Pálma Haraldssonar.
Lárus Welding, fyrrverandi forstjóri Glitnis, og Magnús Arnar Arngrímsson sem var framkvæmdastjóri fyrirtækjasviðs bankans, voru sakfelldir í héraði fyrir umboðssvikin. Þeir áfrýjuðu báðir til Landsréttar, og voru viðstaddir aðalmeðferð málsins í dag en ekki þótti tilefni til að þeir gæfu skýrslu.
Sjá einnig: Sex árum eftir ákæru svarar Jón Ásgeir fyrir sig enn einu sinni

Þvertók fyrir að hafa áhrif á einstök mál Glitnis
Ólafur Þór Hauksson héraðssaksóknari spurði Jón Ásgeir út í ársreikning Aurum frá því í lok janúar 2008, þar sem fram kom að félagið hafi verið rekið með tapi. Jón Ásgeir sagði að langt væri um liðið síðan tiltekinn ársreikningur var gefinn út og að hann „myndi ekki endilega eftir þessu“. Þá mundi hann ekki hvort félagið hefði verið rekið með hagnaði eða tapi árið á undan.
Þá ítrekaði Jón Ásgeir fullyrðingar sínar frá því við aðalmeðferð málsins í héraðsdómi árið 2016 og sagðist ekki hafa haft áhrif á það hvernig Glitnir banki afgreiddi einstök mál.
„Ég vil taka það fram að ég er ekki ákærður fyrir að senda tölvupósta, og ég er ekki heldur ákærður fyrir að vera of ýtinn í samskiptum,“ bætti hann við.
„Food for thought“ ekki skipun
Skýrslutakan yfir Jóni Ásgeiri snerist að mestu um tölvupóstsamskipti hans og hlutaðeigandi aðila, einkum Lárusar Welding, fyrrverandi forstjóra Glitnis, sem sakfelldur var í héraði fyrir umboðssvikin. Fjölda bréfa var varpað á skjá fyrir dómi og var Jón Ásgeir til að mynda inntur eftir því hvort hann hafi oft átt fundi með Lárusi varðandi einstakar lánveitingar.„Já, við vorum í miklum viðskiptum við bankann, þeir voru stórir aðilar á markaðnum, þó að við ættum ekki stærri viðskipti við Glitni en aðra íslenska banka.“
Á einum tímapunkti gerði Jón Ásgeir athugasemdir við orðalag er saksóknari spurði hann út í tölvupóst sem Jón Ásgeir sendi Lárusi um mál sem væru framundan. Undir þau mál skrifaði Jón Ásgeir „food for thought“. Jón Ásgeir og saksóknari deildu um merkingu orðatiltækisins en sá síðarnefndi taldi að með því væri Jón Ásgeir að óska eftir vinnu eða aðgerðum af hálfu Lárusar. Jón Ásgeir hélt því fram að hann hefði verið að koma á framfæri hugmyndum við Lárus.
„Food for thought er ekki skipun,“ sagði Jón Ásgeir. „Ég vek athygli dómsins á að hér eru „pikkaðir“ út 30-40 póstar á milli mín og Lárusar af 500 […] Þetta hefur verið „handpikkað“ með ákveðnum hætti allt saman.“

Fons vel gjaldfært fram að hruni
Pálmi Haraldsson gaf því næst skýrslu fyrir dómi. Saksóknari varpaði aftur ársreikningi Aurum holding á skjá við það tilefni. Pálmi sagðist aðspurður ekki þekkja til talnanna. Þá mundi hann ekki hvenær Baugur og Fons keyptu í félaginu og heldur ekki hvort greiddur hafi verið hagnaður.Þá spurði saksóknari hvaða ástæður lægju að baki þess að virði Aurum í bókum Fons hafi lækkað um helming miðað við það sem notast var við í viðskiptunum sem ákært er fyrir. Verðmæti Aurum er eitt það umdeildasta í málinu.
„Ég get ekki svarað því tíu árum eftir að það gerist en ég geng út frá því að það hafi verið einhver tilfinning,“ sagði Pálmi. Þá sagði hann að blessunarlega væri búið að herða reglur í þessum málum mikið, enda tíu ár síðan umræddir atburðir áttu sér stað, þó að eigendur gætu metið óskráð félög í bókum sínum á mismunandi hátt.
Hann vísaði þannig til WOW air og þess að eigandi félagsins, Skúli Mogensen, hafi sagt verðmæti þess 60 milljónir evra á meðan eigið fé hafi verið nær ekkert. Þá sagði Pálmi að Fons hafi verið með jákvætt eigið fé í lok árs 2007 og að það hafi verið „vel gjaldfært“ allt til 6. október 2008.
Reiknað er með því að saksóknari flytji mál sitt í dag en aðalmeðferðinni ljúki svo á morgun með vörnum verjenda. Þá verður málið dómtekið og dómur kveðinn upp innan nokkurra vikna.