Lögleiðing kannabis til umræðu víða um heim

Kannabis varð löglegt að fullu í Kanada í gær og varð ríkið þar með annað landið í heiminum til að lögleiða efnið að fullu, á eftir Úrúgvæ, sem lögleiddi kannabis árið 2013. Fjöldi annarra ríkja gæti fylgt Kanada eftir í náinni framtíð en á undanförnum árum hefur víða verið slakað á lögum varðandi kannabis.

Forsvarsmenn kannabis-iðnaðarins eru þegar byrjaðir að undirbúa sig fyrir lögleiðingu í öðrum löndum.

„Þetta er sérstakur tími, ekki bara fyrir Kanada, heldur heiminn því ég er sannfærður um að heimurinn muni fylgja Kanada eftir,“ sagði Cam Battley, háttsettur starfsmaður fyrirtækisins Aurora Cannabis í Kanada, við AP fréttaveituna.



„Við erum ekki þekkt fyrir að vera villt og klikkuð. Við erum þekkt fyrir góð stefnumál og ég held að þau muni fylgja okkur.“

Hann er nú á leið til Þýskalands á ráðstefnu fjárfesta þar sem kannabis-iðnaðurinn verðu til umræður. Þar á eftir fer hann til Ástralíu en notkun kannabis í lækningaskyni var leyfð þar árið 2016. Þar mun Battley ræða við forsvarsmenn fyrirtækja og þingmenn.

Í undirbúningi í tvö ár

Lög Kanada voru í undirbúningi í rúm tvö ár. Þau fela í sér að innri ríki landsins geta þróað eigin reglur varðandi notkun kannabis innan reglugerðar landsins. Til dæmis geta stök ríki sett aldurstakmark og ákveðið hvort að sala kannabis verði framkvæmd af einkaaðilum eða ríkjunum sjálfum.

Þá má fólk eiga allt að þrjátíu grömm af kannabis fyrir hvert heimili og er ólöglegt að kaupa kannabis af aðilum sem hafa ekki söluleyfi. Þar að auki stendur til að náða fólk sem hefur verið dæmt fyrir smávægileg kannabis-tengd brot á undanförnum árum. Tugir þúsunda gætu verið náðaðir.

Meðal þeirra ríkja sem þykja líkleg til að taka málið til skoðunar á næstunni eru Nýja Sjáland, Mexíkó, Holland og Ítalía.



Víða slakað á lögum

Ríkisstjórn Nýja Sjálands tilkynnti í fyrra að notkun kannabis í lækningaskyni yrði leifð og að þjóðaratkvæðagreiðsla um lögleiðingu efnisins yrði haldin fyrir árið 2020.

Árið 2009 var varsla smárra neysluskammta afglæpavædd í Mexíkó. Þá þykir ný ríkisstjórn Mexíkó, sem hefur ekki enn tekið við völdum, hliðholl lögleiðingu. Olga Sánchez Cordero, verðandi innanríkisráðherra, tók þátt í nokkrum af úrskurðum Hæstaréttar Mexíkó sem tryggði einstaklingum réttinn til að rækta kannabis til eigin notkunar, hefur gefið út að hún ætli að reyna að lögleiða kannabis.

Andres Manuel Lopez Obrador, verðandi forseti Mexíkó, styður þær ætlanir en flokkur hans stjórnar báðum stigum þingsins í landinu.

Hollendingar skoða að ganga lengra

Yfirvöld Hollands ákváðu að leyfa opnun svokallaðra kaffihúsa, sem selja kannabis, í Amsterdam á áttunda áratugnum. Markmiðið var að reyna að halda notendum frá fíkniefnasölum sem selji harðari fíkniefni en kannabis er enn ólöglegt annars staðar í Hollandi. Söluaðilar í Amsterdam hafa þó kvartað lengi yfir því að þar sem ræktun og framleiðsla efnisins er ólögleg í Hollandi þurfi þeir að leita til glæpasamtaka til að nálgast kannabis til sölu.

Þetta gæti verið að breytast. Yfirvöld Hollands hafa samþykkt tilraunaverkefni þar sem sérstökum framleiðanda kannabis verður leyft að selja efnið í sex til tíu borgum landsins.

Hæstiréttur Suður-Afríku komst að þeirri niðurstöðu að fullorðnir íbúar megi rækta og neyta kannabis í einrúmi. Þó landið sé talið mjög íhaldssamt segja sérfræðingar að lögleiðing kannabis í Kanada hafi opnað dyrnar á frekari umræðu þar um mögulega lögleiðingu.

Ítalía gæti komið á óvart

Málsvarar lögleiðingar hafa barist fyrir lögleiðingu kannabis í Ítalíu um árabil en án árangurs. Hins vegar hefur frumvarp um lögleiðingu verið á flakki um þinghús landsins í tvö ár. Enn sem komið er hefur það ekki notið stuðnings nægjanlega margra þingmanna. Lögleiðing kannabis í Kanada gæti þó haft áhrif á viðhorf þingmanna.

Steve Rolles, greinandi hjá bresku samtökunum Transform, sem berjast fyrir breytingum á lögum um kannabis, segir að Ítalía gæti komið öllum á óvart og verið fyrsta ríki Evrópu til að lögleiða kannabis.

Þingmenn líta til norðurs

Í Bandaríkjunum hafa níu ríki leyft notkun kannabis í afþreyingarskyni og rúmlega 30 ríki hafa leyft notkun efnisins í lækningaskyni. Þar að auki eru íbúar tveggja ríkja, Norður-Dakóta og Michigan, að fara að kjósa í næsta mánuði um að leyfa notkun kannabis í afþreyingarskyni.

Forsvarsmenn kannabis-iðnaðarins í Bandaríkjunum óttast að missa af lestinni og að Kanada muni á endanum taka markaðinn alfarið yfir.

Þó núverandi ríkisstjórn Bandaríkjanna þyki ekki líkleg til að vera í forsvari fyrir mögulega lögleiðingu kannabis þar hafa nokkrir þingmenn tjáð sig um stöðu landsins í þessum málum. Meðal þeirra er þingmaðurinn Ron Wyden sem er frá Oregon, þar sem notkun kannabis er leyfilegt í afþreyingarskyni.

Hann segir að því lengur sem Bandaríkin bíði, því fleiri tækifærum til efnahagslegs ábata muni Bandaríkin missa af.

Donald Trump, forseti Bandaríkjanna, hefur sagt að hann myndi líklega styðja þingið, reyni þingmenn að slaka á lögunum varðandi kannabisefni í Bandaríkjunum. Hins vegar er Jeff Sessions, dómsmálaráðherra Trump, harður andstæðingur kannabis og er hann andsnúinn lagabreytingum.