Elti mann uppi og hrinti honum í veg fyrir leigubíl

Lögregla í Lundúnum hefur birt myndband úr öryggismyndavélum sem sýnir þegar gangandi vegfaranda var hrint í veg fyrir leigubíl í júlí síðastliðnum.

Atburðarásin náðist jafnframt á myndband en í því sést annar maðurinn elta hinn eftir gangstéttinni og hrinda honum svo í veg fyrir leigubíl sem kemur akandi. Manninn sakaði ekki en lögregla segir það skjótum viðbrögðum leigubílstjórans að þakka að ekki fór verr.

Lögregla vonast til þess að birting myndskeiðsins og skjáskota úr því verði til þess að gerandinn gefi sig fram. Þá er einnig lýst eftir vitnum að atvikinu, sem átti sér stað að morgni 23. júlí síðastliðinn. Sky-fréttastofan hefur jafnframt birt mynd af gerandanum, sem vegfarandi tók á vettvangi í júlí.

Myndband af atvikinu má sjá hér að neðan.