Hluthafi í Wizz air fjárfestir í WOW air

Flugfélagið Wow air er sagt hafa gert bráðabirgðasamkomulag um að bandaríska eignastýringarfélagið Indigo Partners fjárfesti í Wow air. Til stendur að ljúka við gerð samkomulagsins eins og fljótt og auðið verður eftir áreiðanleikakönnun. Fyrirhuguð kaup Icelandair á Wow air fóru út um þúfur í dag.

Í tilkynningu sem birtist á vefsíðu Wow air kemur fram að Skúli Mogensen, stofnandi og aðalhluthafi Wow air, muni áfram vera aðaleigandi flugfélagsins eftir fjárfestingu bandaríska félagsins. Skilmálar viðskiptanna eru ekki gefnir upp.

Indigo Partners eru með höfuðstöðvar í Phoenix í Bandaríkjunum. Félagið fjárfestir í flugiðnaði og er aðalfjárfestirinn í Tiger Airways í Singapúr og Spirit Airlines á Flórída. Þá er Indigo einn stærsti hluthafinn í flugfélaginu Wizz air sem flýgur meðal annars til og frá Íslandi.

„Stór dagur fyrir WOW“

Svanhvít Friðriksdóttir, upplýsingafulltrúi Wow air, segir við Vísi að dagurinn í dag sé stór í sögu flugfélagsins. Hún geti hins vegar ekki tjáð sig frekar um fjárfestinguna umfram það sem kemur fram í tilkynningunni.

„Ég er yfir mig ánægður að geta deilt þessu með ykkur öllum! Takk yfir að hafa aldrei hætt að trúa á það verkefni okkar að byggja upp heimsklassa lággjaldaflugfélag. Það er enn mikið verk að vinna en saman getum við haldið áfram að vinna kraftaverk! Ég þakka ykkur öllum,“ skrifaði Skúli í bréfi sem hann sendi starfsmönnum félagsins eftir að tilkynningin um fjárfestinguna var birt í kvöld.

Fréttastofa leitaði eftir viðtali við Skúla en hann bar fyrir sig fyrirmæli frá Indigo um að tjá sig ekki um samninginn.

Stofnað árið 2003

Bandaríkjamaðurinn William A. Franke stofnaði Indigo Partners árið 2003. Í viðtali við bandaríska dagblaðið Los Angeles Times í fyrra var Franke lýst sem manninum sem bæri mesta ábyrgð á stofnun lágfargjaldaflugfélaga í Bandaríkjunum. Velgengni flugfélaga sem hann hefur fjárfest í eins og Spirit hafi neytt stóru flugfélögin til þess að breyta viðskiptalíkani sínu.

Franke fæddist í Texas árið 1937, ólst upp í Suður-Ameríku og útskrifaðist úr Stanfordháskóla. Hann hefur lengi búið og starfað í Phoenix í Arisóna, en hann rekur einnig skrifstofur í Singapúr og Buenos Aires í Argentínu.

Í viðtali við AP á síðasta ári sagði Franke að Indigo fjárfesti ekki í flugfélögum sem eru að hluta í eigu ríkis. „Það gengur einfaldlega ekki. Við verðum því að vera með fjárfestingar sem eru sjálfstæðar, þar sem fólk mun ekki segja mér hvert eigi að fljúga, eða hvenær eigi að fljúga og þannig hluti. Við pössum vel upp á það,“ sagði Franke.

Þetta sagði Franke á flugsýningu í Dubai þar sem tilkynnt var að Indigo hafi fjárfest í 430 Airbus-vélum og var samningurinn metinn á 50 milljarða Bandaríkjadala. Var það sagður stærsti samningur sinnar tegundar, sé litið til fjölda véla.