Davíð Kristján seldur til Álasunds

Davíð Kristján Ólafsson, vinstri bakvörður Breiðabliks, hefur verið seldur frá Pepsi-deildarliði Breiðabliks til Álasunds í Noregi sem leikur í norsku 1. deildinni.

Blikar greina frá þessu á heimasíðu sinni en Davíð fór á reynslu til norska liðsins á dögunum og gerði nóg til að heilla forráðamenn þess. Eftir að einu tilboði var hafnað frá Álasundi tóku Blika öðru tilboði norska félagsins.

Davíð Kristján er 23 ára gamall og á að baki 149 leiki með Breiðabliki og tíu mörk í öllum keppnum. Síðasta sumar náði hann sínum 100. leik fyrir Blika í deild og bikar en hann spilaði alla 22 leiki liðsins í Pepsi-deildinni og fimm í bikarnum.

Hjá Álasundi hittir hann þrjá aðra Íslendinga en með liðinu spila þeir Aron Elís Þrándarson, Hólmbert Aron Friðjónsson og Daníel Leó Grétarsson. Adam Örn Arnarson var einnig á mála hjá liðinu en var seldur til Póllands á dögunum.

Áfram heldur að kvarnast úr leikmannahópi Breiðabliks frá síðasta sumari sem náði silfri í deild og bikar en liðið er búið að miss Gísla Eyjólfsson til Mjällby, Willum Þór Willumsson til BATE Borisov og þá er Oliver Sigurjónsson farinn aftur til Bodo/Glimt.

Á móti eru komnir Kwame Quee frá Víkingi Ólafsvík, Þórir Guðjónsson frá Fjölni og Viktor Karl Einarsson frá Värnamo.

Landsliðsbakvörðurinn Davíð Kristján Ólafsson hefur verið seldur til norska liðsins Álasunds. Forráðamenn liðsins hafa fylgst með Davíð í töluverðan tíma og ekki minnkaði áhuginn þegar leikmaðurinn var valinn í íslenska landsliðið fyrir skömmu
Meira> https://t.co/XTS9yQdq1D pic.twitter.com/UuANvB2KBh

— Blikar.is (@blikar_is) February 14, 2019