Handtekinn við Háaleitisbraut eftir árás á unga konu

Karlmaður í annarlegu ástandi var handtekinn við Háaleitisbraut í hádeginu í dag, grunaður um að hafa sparkað í bíl og svo í kjölfarið ráðist á ökumanninn, unga konu.

Svo virðist sem árásin hafi verið algjörlega tilefnislaus að því er segir í tilkynningu lögreglu. Konan var flutt á slysadeild til skoðunar en meiðsl hennar eru ekki talin alvarleg.

Grunaður árásarmaður var vistaður í fangaklefa á meðan frekari rannsókn fer fram og hægt verður að taka af honum skýrslu.