Markaveislur í Mjólkurbikarnum

HK valtaði yfir Fjarðabyggð, Víkingur vann KÁ, Völsungur átti ekki í vandræðum með Mídas og ÍA hafði betur gegn Augnabliki í 32-liða úrslitum Mjólkurbikars karla.

Pepsi Max-deildarlið HK fór auðveldlega í gegnum annarar deildar lið Fjarðabyggðar í Kórnum. Það byrjaði hins vegar ekki vel fyrir Kópavogsbúa því gestirnir að austan fengu víti á 15. mínútu leiksins.

Nikola Kristinn Stojanovic fór á punktinn og skoraði af öryggi.

Það tók HK hins vegar aðeins sex mínútur að jafna, það gerði Ásgeir Marteinsson. Undir lok fyrri hálfleiks bætti Ásgeir svo öðru marki við og Emil Atlason skoraði þriðja mark HK sem fór eð 3-1 forystu í hálfleik.

Aron Kári Aðalsteinsson og Brynjar Jónasson gerðu svo út um leikinn á fjögurra mínútna kafla í seinni hálfleik, HK vann öruggan 5-1 sigur.

Víkingur Reykjavík sótti KÁ heim á Ásvelli og tók ekki langan tíma fyrir strákana úr Fossvoginum að komast yfir. Halldór Jón Sigurður Þórarson skoraði fyrsta markið á fyrstu mínútu leiksins.

Í upphafi seinni hálfleiks bætti Nikolaj Hansen við öðru marki Víkings. Patrik Snær Atlason gaf heimamönnum von með marki á 80. mínútu en nær komust þeir ekki, Víkingur vann 2-1 sigur.

Í Fífunni tók Augnablik á móti ÍA og Skagamenn voru komnir tveimur mörkum yfir eftir korter. Steinar Þorsteinsson og Óttar Bjarni Guðmundsson skoruðu mörk gestanna.

Viktor Jónsson lagði svo síðasta naglann í kistuna á 74. mínútu, lokatölur urðu 3-0 fyrir ÍA.

Á Húsavík vann Völsungur öruggan fjögurra marka sigur á fjórðu deildar liði Mídas.

Völsungur, Víkingur R., ÍA og HK eru því komin áfram í 16-liða úrslit líkt og Fylkir, Keflavík, Grindavík, Njarðvík, Þróttur R., Fjölnir og Vestri.

Upplýsingar um úrslit og markaskorara eru fengnar frá Úrslit.net.